Ngjarje

Seminar mbi psikanalizën frojdiane në BKSH

2 dhjetor 2017



Në Bibliotekën Kombëtare e Shqipërisë, në bashkëpunim me Rrethin Lakanian Shqiptar, u zhvillua të shtunën, më 2 dhjetor, seminari mbi psikanalizën frojdiane dhe çështjen e transferencës në psikanalizë, me pjesëmarrjen e veçantë të lektorit dhe psikanalistit Geert Hoornaert, anëtar i Shoqatës Botërore të Psikanalizës (AMP) si dhe psikanalistë, psikologë dhe studentë. Gjatë këtij sesioni u analizuan në thellësi pikëpamjet frojdiane, të cilat e shkëpusin me ngadalësi psikanalizën nga metodat e tjera të trajtimit psikik duke vendosur në qendër të saj fjalën, duke u ndalur fillimisht tek arsyet e braktisjes së sugjestionimit dhe ‘catharsis-it’ nga Frojdi, për të kuptuar edhe falë një perspektive historike rëndësinë e transferencës në psikanalizë.

Në ligjëratën e tij psikanalisti Geert Hoornaert fillimisht u ndal në aspektin teorik të psikanalizës duke sjellë raste nga tekstet e para frojdiane mbi transferencën me hezitimet dhe pyetjet që e shoqërojnë. Ai ndau me të pranishmit përvojën belge të trajtimit profesional të pacientëve, një përvojë e vlefshme që mund të aplikohet edhe në Shqipëri. Sipas Hoornaert “Frojdi e shkëputi me ngadalësi psikanalizën nga metodat e ndryshme të trajtimit psikik të cilat përdornin ‘fjalën’ dhe që e kanë shoqëruar gjithmonë artin e shërimit. Nga sugjestionimi hipnotik te metoda e catharsis-it për të mbërritur në fund te psikanaliza, për Frojdin kemi të bëjmë gjithmonë me të njëjtën çështje: si të dallojmë ç’është sugjestionim e ç’është transferencë?”. Ai shtoi më tej se “shpikja e asociacionit të lirë do ta zhvendosë këtë çështje: mjeku nuk është më autoriteti nga ku niset një sugjestionim, është fjala që vishet me pushtet. Frojdi do ta konceptojë transferencën si përfshirja e psikanalistit në psikanalizën e një të analizuari. Në vend të jetë një agjent “i jashtëm”, psikanalisti paraqitet i përfshirë në jetën psikike të analizuarit”.

Gjatë seminarit u trajtuan edhe raste të veçanta klinike, ku të pranishmit shkëmbyen pikëpamjet dhe idetë mbi trajtimin e rasteve problematike. Prezantim klinik i praktikës së Sonilda Barjamaj, Qendra Sociale Multidisiplinare pranë Bashkisë Tiranë, me një fëmijë autik ilustron më qartë këto çështje. Psikanaliza, si praktikë e veçantë e lidhur ngushtësisht me fjalën dhe dëgjimin, po përpiqet tashmë prej vitesh të takojë mendimin shqiptar duke sfiduar mbetjet e ngërçet e një mendimi dhe një gjuhe të drunjtë post-totalitare.