Ngjarje

Konferenca shkencore “Drita e arkivave, dritë mbi arkivat”, një rivlerësim i burimeve arkivore

15 dhjetor 2017



Revista “Shejzat", Biblioteka Kombëtare e Shqipërisë, Drejtoria e Përgjithshme e Arkivave, Ministria për Evropën dhe Punët e Jashtme, zhvilluan të premten, më datë 15 dhjetor, konferencën shkencore “Drita e arkivave, dritë mbi arkivat”, me mbështetjen e Ministrisë së Kulturës dhe me pjesëmarrjen e studiuesve, historianëve, arkivistëve e specialistëve të fushës. Kjo konferencë e rëndësishme shkencore u iniciua nga e përkohshmja e rithemeluar “Shêjzat - Pleiades” (themeluar në Romë në vitin 1957 nga Ernest Koliqi), vjen si vijim i nismës për vlerësimin e burimeve arkivore të historisë sonë kombëtare. Ajo pasqyron edhe interesin gjithnjë në rritje të studiuesve të huaj dhe atyre vendas për arkivat dhe fondet e veçanta ku janë përpunuar dhe ruhen materiale me rëndësi për historinë tonë, si dhe rëndësinë e studimit të arkivave, si burime parësore për historishkrimin tonë.

Në fjalën e tij përshëndetëse, iniciatori i kësaj veprimtarie, Prof. Ardian Ndreca, drejtor i Revistës “Shêjzat” dhe profesor i filozofisë në Universitetin Urbanian të Vatikanit, u shpreh se “arkivat janë alfabeti i dijes historike. Nëse më parë kemi pasur një asimetri midis arkivave dhe historisë së shkrimit, kthimi te arkivat është një dëshmi e seriozitetit të punës së historianit. Nga shkrimi i historisë varet dhe e ardhmja jonë. Arkivat na lejojnë një lexueshmëri më racionale të historisë. Prej leximit të arkivave varet edhe kuptueshmëria e saj, përmes një metodologjie shkencore dhe përgatitje paraprake për këtë lexim”. Duke folur për rëndësinë dhe pasurinë e jashtëzakonshme të arkivave prof. Ndreca theksoi se “bashkëpunimi i ngushtë me Bibliotekën Kombëtare të Shqipërisë dhe Drejtorinë e Përgjithshme të Arkivave është tregues i sinergjisë pozitive që ekziston mes institucioneve dhe studiuesve të cilët punojnë që drita e arkivave të kthehet në burim për shkrimin sa më objektiv të historisë sonë, larg interpretimeve të politizuara dhe atyre romantike”. Mbështetja e Ministrisë për Evropën dhe Punët e Jashtme dhe Ministrisë së Kulturës reflektojnë interesin që diplomacia jonë e sotme tregon për paraqitjen sa më objektive të historisë sonë në botë si dhe ndjeshmërinë në promovimin e vlerave parësorë të kulturës dhe shkencës sonë.

“Përkufizimi Drita e arkivave-dritë mbi arkivat flet mjaft bukur për atë dritë që na lejon të zhvillojmë mendimin tonë, leximin tonë mbi historinë dhe dokumentet”, u shpreh Prof. dr. Persida Asllani, Drejtore e Bibliotekës Kombëtare. Ndërsa drejtori i Arkivit Qendror të Shtetit, Ardit Bido “Shejzat janë trashëgimia e vyer që kanë studimet albanologjike. Është një kënaqësi që po i kthejmë studimet nga arkivat. Konferencat zakonisht janë historike dhe nuk e shohin arkivën si një profesion”.

Në kumtesat e tyre, studiuesit Lucia Nadin, Italo Sarro, Pranvera Teli, Ardian Ndreca, Marenglen Kasmi, Andi Rembeci, Enilda Kola dhe Etleva Domi, Mikaela Minga, David Hosaflock, Carlo Pardi, Sokol Çunga, Gjovalin Çuni, etj., përmes kërkimeve në arkivat e Vatikanit, Venedikut, në Arkivin e Shtetit, në Arkivat Ushtarake gjermane dhe italiane, në Arkivin e MEPJ, në Arkivin e Ministrisë së Punëve të Jashtme të Italisë, Bibliotekës Kombëtare, etj., prekën tema të rëndësishme dhe risollën në vëmendje të dhënat e çmuara dhe të jashtëzakonshme mbi Shqipërinë, historinë dhe kulturën, të cilat gjenden në arkivat italiane, gjermane, etj., apo edhe në arkivat e bibliotekave e shoqërive të ndryshme, deri në korrespondencat private të personaliteteve historike.

Risi e këtij aktiviteti ishte edhe prezantimi i botimit të Akteve të konferencës, kumtesat e saj janë botuar në revistën “Shejzat - korrik-dhjetor 2017”.