Ngjarje

BKSH prezanton botimin “Musine Kokalari - vepra të zgjedhura” në veprimtari të ndryshme gjatë vitit 2017.



Në përmbyllje të vitit kulturor kushtuar veprës dhe jetës së Musine Kokalarit, Biblioteka Kombëtare e Shqipërisë dhe Ministria e Kulturës mundësuan botimin në 3 vëllime të “Veprës së zgjedhur” të Musine Kokalarit. Viti 2017, që përkon me 100-vjetorin e lindjes së shkrimtares së parë shqiptare, u shpall si “Viti i Kujtesës”, me qëllim nxitjen dhe promovimin e çdo akti kujtese, veçanërisht atij ndaj viktimave të diktaturës komuniste. Në këtë botim special janë përfshirë “Siç më thotë nënua plakë” dhe “Nënua plakë në Romë””, “…sa u tund jeta”” si dhe “Jeta ime universitare””, përthyer nga Arta Marku, me parathënie studimore nga studiuesit italianë Mauro Geraci dhe Simonetta Ceglie dhe një ese nga Visa Zhiti.

Musine Kokalari përfaqëson një simbol ekskluziv në botën shqiptare, si shkrimtarja e parë në letrat shqipe, me një vetëdije të qartë për shkrimin e letërsisë, intelektuale e shquar e aktive në jetën sociale e kulturore të vendin, politikane bashkëthemeluese e Partisë Social-Demokrate, por edhe një prej figurave më dinjitoze të qëndresës kundër diktaturës komuniste, duke nisur që nga apologjia e saj në gjyq, e deri te përballja me një dinjitet të skajshëm femëror e njerëzor, intelektual e ideal ndaj torturave, burgosjes, internimit e keqtrajtimit të vijueshëm çnjerëzor fizik e psikologjik. Të vetëdijshëm jo vetëm për vlerat që ajo përfaqëson sot për ne, por sidomos të vetëdijshëm mbi domosdoshmërinë e përballjes sonë si shoqëri demokratike me të shkuarën diktatoriale, në përpjekje për të shenjuar krijimtarinë e saj letrare e publicistike, si edhe kalvarin e saj nën diktaturë, gjatë këtij viti u zhvilluan një sërë veprimtarish kulturore si konferenca shkencore, ekspozita, lexime publike të veprës së saj me nxënës dhe studentë, si dhe leximi publik i dosjes së saj. Këto aktivitete kulturore të zhvilluara në Tiranë, Prishtinë dhe Romë synojnë të rikthejnë vëmendjen në figura të rëndësishme të kulturës dhe botës shqiptare.

Gjatë muajve nëntor dhe dhjetor u zhvilluan një sërë aktivitetesh kulturore dhe vepra e Musine Kokalarit iu prezantua grupeve shoqërore dhe moshave të ndryshme, si nxënës dhe studentë, historianë dhe studiues, si edhe publikut të gjerë, brenda dhe jashtë vendit.

9 nëntor 2017 - Në nderim të vlerave që Musine Kokalari përfaqëson për shoqërinë shqiptare, si një prej figurave më dinjitoze të qëndresës kundër diktaturës në Muzeun Kombëtar “Gjethi” u promovua për herë të parë përmbledhja e veprës së saj, me pjesëmarrjen e veçantë të nxënësve të shkollës së mesme “Petro N. Luarasi”. Takimi “Letërsia e ndaluar: Musine Kokalari”, pjesë e fushatës kombëtare të leximit “Takohemi për një libër”, drejtohej nga Persida Asllani, Drejtore e Bibliotekës Kombëtare, Mimoza Hysa, Drejtore e Krijimtarisë së Fjalës dhe Përkthimit në Ministrinë e Kulturës dhe përkthyeses e gazetares Arta Marku, synoi të sjellë më afër brezit të ri një nga figurat më rëndësishme të kulturës shqiptare si dhe njohjen dhe leximin e veprës së saj. Gjatë këtij aktivitetit nxënësit e shkollës së mesme “Petro N. Luarasi” lexuan pjesë nga veprat e saj.

21 nëntor 2017 - Në Muzeun Historik u zhvillua aktiviteti mbi leximin publik të dosjes së Musine Kokalarit, në kuadrin e “Ditëve të Kujtesës” organizuar nga Instituti për Demokraci, Media & Kulturë (IDMC), Instituti Musine Kokalari, së bashku me Bibliotekën Kombëtare dhe Muzeun Historik Kombëtar. Gjatë aktivitetit u lexuan disa pjesë nga kjo dosje ku tregohet persekutimi dhe qëndresa e saj e pazakontë. Një vend të veçantë zuri edhe prezantimi i botimit në tri vëllime të "Musine Kokalari-vepra të zgjedhura", duke risjellë në vëmendje krijimtarinë letrare të shkrimtares së parë shqiptare Musine Kokalari.

27 nëntor 2017 – Si shkrimtarja e parë shqiptare, Musine Kokalari, zë një vend të rëndësishëm mes personaliteteve femërore shqiptare. Në prag të festave të nëntorit Fondacioni “Nermin Vlora Falaschi” dhe Biblioteka Kombëtare zhvilluan veprimtarinë kremtuese “Zonjat e paharrueshme të Shqipërisë”, me pjesëmarrjen e intelektualeve dhe personaliteteve të shquara të kulturës dhe shoqërisë. Gjatë këtij aktiviteti u prezantua edhe botimi “Musine Kokalari-vepra të zgjedhura”.

4 dhjetor 2017, Romë - Universiteti italian “La Sapienza”, në të cilin Musine Kokalari studioi për Letërsi në Romë gjatë viteve 1937-1941, i kushtoi më datë 4 dhjetor një ditë të veçantë studimore duke u mbështetur kryesisht në vlerësimin dhe analizën e veprës së saj të shkruar në gjuhën italiane “Jeta ime universitare”. Pjesëmarrësit në këtë konferencë, studiues të letërsisë moderne italiane e evropiane, dinjitete të antropologjisë kulturore italiane si dhe studiues të dukurive gjinore e letrare, e cilësuan dëshminë e Kokalarit si një pasurim të çmuar të qasjes antropologjike mbi shoqërinë italiane të viteve të fashizmit, e bërë pikërisht nga një shkrimtare e re shqiptare nga perspektiva e saj qytetërimore e botëkuptimore. Në mbyllje të konferencës drejtorja e Bibliotekës Kombëtare, prezantoi edhe një ekspozitë virtuale mbi “dosjen e sigurimit të shtetit” si dëshmi e një persekutimi sistematik por edhe e qëndresës shembullore të Musine Kokalarit. Për të pranishmit ajo prezantoi edhe botimin e “Veprës së zgjedhur” në 3 vëllime përgatitur nga BKSh dhe Ministria e Kulturës.

Kjo seri e Veprës së zgjedhur u botua për të përmbushur mungesën e librave të Musine Kokalarit në bibliotekat e vendit. Shpërndarja e përkujdesur nga Biblioteka Kombëtare e Shqipërisë do të mundësojë kështu një pasurim të bibliotekave publike dhe universitare jo vetëm në Shqipëri por edhe në Kosovë, Rajon dhe pranë katedrave albanologjike në Evropë.