Ngjarje

Seminari “Përthyerje antropologjike” në Bibliotekën Kombëtare

24 qershor 2016



Në Bibliotekën Kombëtare të Shqipërisë, në bashkëpunim me Departamentin e Etnologjisë, Instituti i Antropologjisë Kulture dhe Studimit të Artit, u zhvillua të premten mbasdite, 24 qershor, seminari i dytë “Përthyrje Antropologjike”, me pjesëmarrjen e antropologë, studiues, etnografë, muzikologë si dhe studentë. Gjatë këtij takimi u prezantua dhe diskutua mbi librin “Nën Shenjën e Modernitetit: Antropologji e proceseve proletarizuese gjatë socializmit shtetëror”, të studiuesit antropolog dr. Olsi Lelaj.

Gjatë fjalës së tij dr. Lelaj theksoi se “në këtë monografi shqyrtohen proceset klasë-formuese në Shqipëri gjatë komunizmit. Duke rrokur një qasje diakronike në leximin e proceseve proletarizuese të fshatarësisë dhe krijimit të klasës punëtore, ky studim, me prerje antropologjike, analizon se cilat janë forcat shtytëse sociale që luajnë rol transformues për grupet shoqërore dhe individin në modernitet kur mungojnë forcat e tregut në shoqëri”. Autori e sheh proletarizimin e fshatarësisë gjatë komunizmit në Shqipëri si produkt i mënyrës shtetërore të prodhimit. Nëpërmjet të dhënave empirike dhe interpretimeve të tyre, ky studim, duke e marrë Shqipërinë gjatë periudhës së komunizmit si rast paradigmatik, përpiqet të kuptojë natyrën dhe pasojat e modernitetit të planifikuar nga shteti mbi shoqërinë.