Ngjarje

Edicioni i tretë i Konferencës Kombëtare të Bibliotekonomisë

 

 

Si institucion kulturor-shkencor i përbashkët Shqipëri-Kosovë, Konferenca Kombëtare e Bibliotekonomisë mbajti më 20 - 22 nëntor 2008 edicionin e tretë të saj nën temën “Biblioteka - urë mes dijes dhe publikut". Veçori e këtij edicioni ishte fakti që Biblioteka Kombëtare dhe Universitare e Kosovës u prezantua si bibliotekë kombëtare tashmë e një shteti të pavarur.

Konferenca ka organizim të përvitshëm, përkatësisht: një vit në Tiranë, një vit në Prishtinë, dhe edicionet e saj mbahen nën kujdesin dhe mbështetjen e dikastereve përgjegjëse të kulturës të të dy vendeve. Kjo ishte e dyta herë që kjo konferencë u mblodh në Tiranë nën organizimin e Bibliotekës Kombëtare të Shqipërisë. Në të morën pjesë autoritete të drejtimit dhe menaxhimit të bibliotekave kombëtare, universitare, publike etj. nga Shqipëria dhe Kosova, si dhe specialistë të bibliotekonomisë nga të dyja vendet.

Seancën plenare e hapën Dr. Aurel Plasari, drejtor i Bibliotekës Kombëtare të Shqipërisë, dhe Sali Bashota, drejtor i Bibliotekës Kombëtare dhe Universitare të Kosovës, bashkëthemelues të kësaj konference, të cilët, pasi përshëndetën të ftuarit dhe pjesëmarrësit, vunë në dukje rëndësinë dhe kontributet e një veprimtarie të tillë në zhvillimin e bibliotekave shqiptare si dhe në përballimin e sfidave profesionale në punën e tyre si ndërmjetëse mes dijes dhe përdoruesve. Konferencën e përshëndetën edhe znj. Zana Turku, zëvendësministre e Turizmit, Kulturës, Rinisë dhe Sporteve dhe z. Gazmend Pula, ambasador i Republikës së Kosovës në Shqipëri.

Specialistë të bibliotekave paraqitën kumtesa, në të cilat analizoheshin praktikat, por dhe vizionet e përbashkëta për rolin që luajnë në epokën digjitale bibliotekat si ura ndërmjet publikut dhe dijes. U trajtuan probleme të ndryshme të praktikës dhe të teorisë bibliotekare që kanë të bëjnë me shërbimin e referencave në “autostradën” informative, fillimin e procesit të digjitalizimit të koleksioneve në Bibliotekën Kombëtare të Shqipërisë, raportin bibliotekë – internet në kërkimin e avancuar, etikën profesionale, dukuri të raporteve bibliografi e librit – përdorues, procesin e konvertimit retrospektiv etj. Temat u fokusuan në evidentimin e rolit ndërmjetës të bibliotekave midis dijes që bartin koleksionet bibliotekare dhe përdoruesve që e shfrytëzojnë atë: ky pozicion tradicional i bibliotekave u trajtua në kushtet e reja të shoqërisë së informacionit dhe të kërkesave të lexuesve për dije dhe njohuri bashkëkohore.