Ngjarje

Biblioteka Kombëtare e Shqipërisë pjesëmarrëse në Javën e Bibliotekave në Kosovë

10 Prill 2018



Biblioteka Kombëtare e Shqipërisë mori pjesë në edicionin e XVI-të të Javës së Bibliotekës, organizuar nga Biblioteka Kombëtare e Kosovës “Pjetër Bogdani”, me pjesëmarrjen e Kryeministrit të Kosovës, z. Ramush Haradinaj, ministrit të Kulturës, Rinisë dhe Sportit, z. Kujtim Gashi, ambasadorit të SHBA në Kosovë, z. Greg Delawie, Prof. Dr. Persida Asllani, Drejtore e Bibliotekës Kombëtare të Shqipërisë, bibliotekarë dhe përfaqësues të bibliotekave të qyteteve të Kosovës dhe të BKSh, studiues, shkrimtarë, botues, përfaqësues të kulturës e të politikës, pedagogë, studentë dhe lexues. Java e Bibliotekës u zhvillua në Prishtinë nga data 10 deri më 14 prill me temë “Arsimimi dhe trajnimi bibliotekar” dhe gjatë saj promovohen dijet dhe sfidat e bibliotekonomisë si edhe aktivitetet kushtuar librit e kulturës së leximit. Kjo Javë shënon edhe vazhdimin e bashkëpunimit të ngushtë midis Bibliotekës Kombëtare të Shqipërisë dhe Bibliotekës Kombëtare të Kosovës “Pjetër Bogdani”.

Në fjalën e hapjes së kësaj Jave, drejtori i Bibliotekës Kombëtare të Kosovës, z. Fazli Gajraku, shprehu domosdoshmërinë “që të gjithë të bëjmë punë për të tërhequr komunitetin - njerëzit në biblioteka, për të promovuar leximin, për të ndihmuar në kërkim dhe shumë më tepër se kaq”. Ai shtoi se “krijimi i një programi praktik bibliotekar është një detyrim ligjor i Bibliotekës Kombëtare, program që kërkon të ofrojë dije themelore në fushën e bibliotekonomisë dhe të shkencave të informacionit. Kjo veprimtari synon të jetë një pikënisje e rritjes së ndërgjegjësimit dhe mbështetjes për Bibliotekat e Kosovës”. Ndërkohë Kryeministri i Kosovës, z. Ramush Haradinaj, e përshëndeti këtë aktivitet dhe vlerësoi “punën e njerëzve që e ruajnë dhe shpërndajnë librin, e njëherazi ndërgjegjësojnë publikun për bibliotekat”. Çeljen e Javës së Bibliotekave e përshëndetës edhe Ministri i Kulturës, Rinisë dhe Sportit, z. Kujtim Gashi si dhe ambasadori i Shteteve të Bashkuara të Amerikës në Kosovë, z. Greg Delaëie, të cilët gjithashtu theksuan nevojën e vazhdueshme në sensibilizimin e publikut për rëndësinë e bibliotekave si institucionet themelore në edukimin e të rinjve.

Në kuadër të saj dhe të vitit përkujtimor kushtuar 550-vjetorit të vdekjes së heroit kombëtar, Gjergj Kastrioti Skënderbeu, Biblioteka Kombëtare e Shqipërisë çeli në Prishtinë edhe ekspozitën kushtuar figurës së Skënderbeut në letërsi. Sipas drejtoreshës së BKSH-së, znj. Persida Asllani, “kjo ekspozitë rreket të tregojë se askund më mirë se në figurën e Skënderbeut u mishërua e përbashkëta jonë identitare mbarëkombëtare dhe evropiane, një identitet i patjetërsueshëm, i pavarur nga kufijtë, nga hartat, pushtuesit, pushtetet, nga fetë, nga ideologjitë, nga valët e emigrimeve, nga rrjedhat e politikës kalimtare”. Qysh prej Barletit e Bardhit, e sidomos me shkëndijat e para të Rilindjes sonë kombëtare, teksa zë fill në botën arbëreshe, në zemrat e mendjet e Dorsës, Kamardës, De Radës etj, Skënderbeu dhe kujtimi i Motit të Madh të “Rapsodive arbëreshe” u shndërruan në boshtin qendror ku do të mbështetej ringjallja e Kombit. Për të shkruajnë vargje të paharrueshme edhe Naimi e Çajupi, Mjeda e Asdreni, Jubani e Shiroka, me thirrjen për t’i besuar edhe një herë së bashku Gjergj Kastriotit dhe simbolit të tij të lirisë. Por shqiptarët nuk janë të vetmit në historinë e Evropës që e panë Skënderbeun si simbol të lirisë. Veç veprave të pafundme historike me frymëzim barletian, për të u shkruan mijëra vargje poemash e veprash dramatike, sikundërse edhe qindra pentagrame partiturash muzikore e veprash të arteve pamore që populluan panteonin e Kulturës së përbotshme. Më tej drejtoresha Asllani vuri në dukje se “duke dashur të përcjellim këtë frymëzim marramendës e të shumëfaqshëm Biblioteka Kombëtare paraqiti në Prishtinë, veç librave të përzgjedhur me kujdes, edhe riprodhime nga gravurat e njohura qe ilustrojnë antikuaret e mirënjohur të historisë dhe letërsisë botërore, duke filluar nga gravurat e Jost Amman, nga botimi gjerman i Barletit, Frankurt, 1577; për vijuar me gravurat e hijshme të Nicolas Auroux, të realizuara posaçërisht për antikuarin e hijshëm të poemës së Johan Bussieres botuar më 1658; si dhe skenat ilustruese të tragjedisë së Uincop, Skënderbeu- Dashuria e liria, e vitit 1747, ku përfytyrimi neoklasik në shprehi, ndjesi, mendësi e madje edhe interiere dhe veshje, i mvishet epokës heroike të arbrit”. Studiuesit numërojnë vepra letrare kushtuar Skënderbeut në mbi 20 gjuhë të botës.

Java e Bibliotekave në Kosovë vijoi me aktivitete të shumta promovuese të leximit dhe librit, konferenca dhe sesione shkencore, çelje ekspozitash, jo vetëm në Prishtinë por edhe në disa nga bibliotekat ndërkomunale të Kosovës, si në Prizren, Pejë e Gjilan. Këto sesione shkencore theksuan vijimin e bashkëpunimit të ngushtë midis dy Bibliotekave Kombëtare në fushën e arsimimit dhe trajnimit të vazhdueshëm bibliotekar të specialistëve. Gjatë punimeve të këtyre sesioneve u trajtuan tema thelbësore të shkencës së bibliotekonomisë si: konceptet e bibliotekave moderne, zhvillimi i programeve të aftësimit profesional krahas zhvillimeve teknologjike, zhvillimi i koleksioneve, evidentimi i pasurimit të koleksioneve, përpunimi i koleksioneve, etj.. Në ditën e parë të punimeve, mbajtur në Prishtinë, tema thelbësore e trajtesave ishte koncepti dhe roli i bibliotekave moderne, e cila erdhi qartazi përmes kumtesave si “Revolucioni teknologjik: sfidë në formimin dhe trajnimin e vijueshëm bibliotekar kombëtar” i Dr. Etleva Domi dhe “Teknologjia dhe hapësira virtuale” i Msc. Enilda Kola, tema të cilat ngjallën interesin e pjesëmarrësve. Punimet e Javës së Bibliotekave vijuan në qytetin e Prizrenit, ku tematika e referimeve u fokusua më së shumti në domosdoshmërinë e arsimimit dhe trajnimit të vijueshëm bibliotekar, si “Kërkimi shkencor në arenën digjitale” nga Msc. Brunilda Tahiri; “Evidentimi i pasurimit të koleksioneve bibliotekare” nga Msc. Refije Elezaj; “Klasifikimi i materialeve bibliotekare” nga Mejli Kokona. Shkëmbimi i përvojës profesionale midis specialistëve të bibliotekave vjen edhe si një nevojë e vazhdueshme dhe e rëndësishme në rolin e ri të bibliotekave, si institucione thelbësore në edukim.