Ngjarje

Biblioteka Kombëtare, aktivitete kremtuese në Ditën Botërore të Librit dhe të së Drejtës së Autorit

23 Prill 2018



Biblioteka Kombëtare e Shqipërisë çeli të hënën, më datë 23 prill, aktivitetet kulturore të organizuara në kuadër të Ditës Botërore të Librit dhe të së Drejtës së Autorit. Këto aktivitete u konceptuan si një ditë “feste” për të shkëmbyer ide e informacione si dhe për të promovuar te të rinjtë kulturën e leximit, duke përfshirë grup-mosha të ndryshme si dhe bashkëveprimet interaktive midis tyre.

Ora 09:00 - Në bashkëpunim me Qendrën Rinore të Tiranës, nxënës të shkollës së mesme “Sami Frashëri” vizituan Bibliotekën Kombëtare. Të rinjtë u njohën më nga afër me bibliotekën e rolin e saj si orientuese dhe urë lidhëse të dijes me lexuesin. Studentët u prezantuan me mënyrën e funksionimit të Bibliotekës, procesit të regjistrimit, shfrytëzimit të materialeve me vlerë të fondit të saj, shërbimet online që ofron BKSh përmes faqes së saj zyrtare, të cilat lehtësojnë dhe ndihmojnë qasjen në informacion, si Katalogët online, Katalogët e digjituar, Biblioteka digjitale, e-Bibliografi, Këndet e leximit digjital, etj.. “Aftësimi në Informacion”, si një formë e re komunikimi me publikun e gjerë, po shfrytëzon teknologjitë e reja si burime referuese, duke nxitur bashkëveprimin e publikut me Bibliotekën. Njohja e mjeteve dhe mënyrave të kërkimit është një nga proceset më të rëndësishme për të arritur te informacioni, duke shkuar drejt “Bibliotekave pa mure”.

Ora 11:00 - Studentë të degës së grafikës së Universitetit të Arteve morën pjesë në programin e aftësimit në informacion mbi mënyrën si të përdoret sa më cilësisht biblioteka dhe informacioni që përgatitet prej saj. Studentëve iu paraqitën disa modele kërkimi në bazën e të dhënave të BKSh-së si dhe metodat e kërkimit online në rrjetin evropian dhe atë botëror të bibliotekave. Specialistët e Bibliotekës Kombëtare prezantuan modele kërkimi në librat e artit, tematika mbi artin, fotografinë, grafikën, albume, etj., materialet të cilat përbëjnë edhe interesin më të madh të studentëve të Universitetit të Arteve.

Ora 11:00 - Në godinën e vjetër të Bibliotekës Kombëtare, nxënës të shkollës 9-vjeçare “Vatra e Dijes” vizituan sallat e leximit duke u njohur me programet dhe aktivitetet që organizohen në to. Një vëmendje të veçantë iu kushtua restaurimit të librave, ku fëmijët u njohën dhe mësuan mbi procesin e gjatë dhe të bukur të ‘shërimit’ të librave të dëmtuar. Më tej, në Sallën Franceze të Leximit, me një atmosferë ilustruese nga bota e përrallave e librit dhe me personazhet letrarë më të njohur e të dashur për fëmijë, përmes leximit të pjesëve të zgjedhura nga “Porosia e fundit e Gjergj Kastriotit” dhe “Skënderbeu provon shpatën e re”, miqtë e vegjël të librit ndanë me njëri-tjetrin kënaqësinë e leximit dhe kërshërinë për të njohur heroin kombëtar, Gjergj Kastrioti Skënderbeu. Nxënësve të vegjël më pas iu bashkuan studentët e grafikës, të cilët së bashku me ta shndërruan tregimet për Skënderbeun në një “tregim me figura”, duke realizuar krijime artistike shumë të bukura.

Ora 12:30 - Biblioteka Kombëtare e Shqipërisë iu bashkua edhe aktiviteteve të shumta kulturore të organizuara nga Fakulteti i Historisë dhe i Filologjisë, Universiteti i Tiranës, në kuadër të 80-vjetorit të ndarjes nga jeta të Migjenit, me pjesëmarrjen e studiuesve, shkrimtarëve, pedagogëve e studentë, përfaqësues të shtëpive botuese, etj., ku u promovuan disa nga botimet më të fundit studimore e letrare, u zhvilluan tryeza të rrumbullakëta, Festivali i Krijimit Letrar, interpretime të krijimtarive artistike nga Klubi i Dramës të studentëve të Departamentit të Letërsisë si dhe Panairi i Librit. Biblioteka Kombëtare solli për të pranishmit ekspozitën digjitale “Migjeni në shtypin retrospektiv” me botimet e para të krijimtarisë letrare të Migjenit në revistat dhe gazetat e kohës si “Illyria”, “Minerva”, “Bota e re” dhe “Jeta dhe kultura”.