Ngjarje

Biblioteka Kombëtare, konferencë shkencore kushtuar
veprës së Xhevat Lloshit

11 Maj 2018



Biblioteka Kombëtare e Shqipërisë dhe Shoqata e Gjuhësisë Shqiptare organizuan të premten, më datë 11 Maj, konferencën shkencore me temë “Çështje të leksikografisë, leksikologjisë, stilistikës, filologjisë dhe të shqipes standarde në veprën e prof. dr. Xhevat Lloshit” me rastin e 80-vjetorit të lindjes së prof. dr. Xhevat Lloshit, me pjesëmarrjen e akademikëve, studiuesve, gjuhëtarëve, etj., nga Tirana dhe Prishtina. Prof. Dr. Xhevat Lloshi është një nga personalitetet më të rëndësishme të shkencës shqiptare, me një kontribut të jashtëzakonshëm jo vetëm në gjuhësi por edhe në filologji, historiografi, studime letrare, hartues i fjalorëve dhe përkthyes i veprave të rëndësishme të kulturës botërore, të cilat kanë pasuruar vazhdueshëm kulturën shqiptare.

Në fjalën e saj përshëndetëse drejtoresha e Bibliotekës Kombëtare, Prof. Dr. Persida Asllani, duke vlerësuar punën dhe kontributin e jashtëzakonshëm të prof. Xhevat Lloshit në shkencën dhe kulturën shqiptare, theksoi se “duke shfletuar kronologjikisht punën kërkimore shkencore të prof. Xhevat Lloshit, nga artikujt e parë në vitin 1960, deri në botimet më të fundit që sollën veprën e Kristoforidhit, na dëshmohet entuziazmi i patjetërsueshëm që e karakterizon atë si kërkues dhe shkencëtar gjatë punës kërkimore shkencore”. Ekspozita modeste e përgatitur nga Biblioteka Kombëtare solli për të pranishmit një punë shkencore 60-vjeçare, duke nisur nga artikujt e parë shkencorë në “Arësimi popullor” e deri te veprat më të spitakura, si botimi special i albumit “Libri shqip dhe veprimtaria protestante: 200 vjet rrugëtim kulturor”, botim i Bibliotekës Kombëtare të Shqipërisë.

Konferenca shkencore me temë “Çështje të leksikografisë, leksikologjisë, stilistikës, filologjisë dhe të shqipes standarde në veprën e prof. dr. Xhevat Lloshit”, e cila përmes kumtesave të akademikëve dhe studiuesive nga Shqipëria dhe Kosova, si Emil Lafe, Floresha Dado, Mehmet Çeliku, Anila Omari, Shefkie Islamaj, Rami Memushaj, Valter Memishaj, Xhevdet Shehu, Kujtim Bevapi, Kujtim Kapllani, Artur Lamaj, Mimoza Kore, Viktor Ristani dhe Albana Ndoja, shpalosi punën shkencore 60-vjeçare të prof. Lloshit. E gjithë veprimtaria shkencore e prof. Xhevat Lloshit përfshin disiplinat e gjuhësisë si, semantika, leksikologjia e leksikografia, stilistika, terminologjia, kultura e gjuhës, albanologji, didaktika e gjuhës shqipe, histori e gjuhës shqipe dhe filologji, hartimi i fjalorëve, veprimtari u përket kjo jo vetëm çështjeve teorike, por edhe zbatimeve të saj. Një nga kontributet e rëndësishme e prof. Xhevat Lloshit është edhe vënia në një bazë të fortë shkencore e studimeve gjuhësore dhe historike, sidomos në themelimin e një disipline pa traditë shkencore si stilistika dhe pragmatika. I vlerësuar si një ‘pasurues’ i kujtesës shkrimore të shqipes, çka e dëshmon edhe puna shumëvjeçare në arkiva për të siguruar dokumente të panjohura më parë për jetën dhe veprimtari e Kostandin Kristoforidhit, duke transkriptuar veprën e tij në alfabetin e sotëm shqip.

Në vitin 2017, prof. Xhevat Lloshit iu dha nga Biblioteka Kombëtare në shenjë mirënjohjeje dhe vlerësimi, Certifikata e Mirënjohjes për “Për ndihmesën e tij të vyer në pasurimin e vijueshëm të koleksioneve bibliotekare të fondit me karakter albano-balkanologjik”.