Ngjarje

Studiuesja angleze Averil Cameron në Bibliotekën Kombëtare

 

 

Znj. Averil Cameron, profesoreshë e historisë së antikitetit të vonë dhe të Bizantit në Universitetin e Oksfordit, ishte e ftuar më 7 janar të vitit 2009 në Bibliotekën Kombëtare në bashkëpunim me Qendrën e Studimeve Albanologjike dhe Institutin e Historisë. Në takimin e organizuar si tryezë e rrumbullakët në mjediset e institucionit studiuesja angleze trajtoi probleme të rëndësishme të historisë së Bizantit dhe veçanërisht të asaj pjese të saj që lidhet drejtazi me historinë e Shqipërisë.

Aurel Plasari, drejtor i Bibliotekës Kombëtare, shprehu kënaqësinë e pritjes në këtë institucion të profesoreshës së nderuar Averil Cameron, çka krijon mundësinë e njohjes prej së afërmi të saj, si edhe kënaqësinë e bashkëpunimit në veprimtari të tilla me interes të përbashkët me institucionet e varësisë së Qendrës së Studimeve Albanologjike. E ftuara falënderoi shtëpinë botuese “Dituria” për botimin vitin e kaluar të librit të saj “Bizantinët”, i cili ka ngjallur interesin e specialistëve dhe, në përgjithësi, të lexuesve shqiptarë.

Diskutuesit që morën fjalën - specialistë nga më të njohurit e kësaj fushe - vunë në dukje vlerat e spikatura të librit të znj. Cameron. Aleksandër Meksi vlerësoi sidomos paraqitjen në këtë botim të Shqipërisë si pjesë e Perandorisë Bizantine për një kohë të gjatë, ndryshe nga literatura tradicionale që e ka anashkaluar këtë realitet shkencor. Luan Malltezi theksoi që ky takim ishte një rast i mirë për të njohur një nga studiueset më të zëshme të Bizantit, një autore, e cila në veprën e vet sjell informacion të madh për historinë dhe kulturën shqiptare. Pëllumb Xhufi, si theksoi që të shkruash për Bizantin është një sfidë e vërtetë për shkak të një tradite të fuqishme që tashmë ekziston, nënvizoi disa nga risitë që sjell autorja në këtë libër duke nisur që nga titulli, i cili paralajmëron një optikë të ndryshme të trajtimit të fakteve historike. Paraqitën interes edhe diskutimet e bëra nga Maks Velo, Ferit Duka, Dritan Egro etj.

Fjalën e mbylljes e mbajti Beqir Meta, drejtor i Institutit të Historisë, i cili falënderoi znj. Averil Cameron për librin dhe vizitën në Shqipëri.