Ngjarje

Bibliotekarë nga Polonia vizitojnë Bibliotekën Kombëtare të Shqipërisë

11 Korrik 2018



Bibliotekarë nga Shoqata e Bibliotekarëve të Polonisë vizituan të Mërkurën, më datë 11 Korrik, Bibliotekën Kombëtare të Shqipërisë. Gjatë kësaj vizite bibliotekarët polakë shfaqën interes të veçantë të njihnin historikun e krijimit të Bibliotekës Kombëtare të Shqipërisë dhe veprat më të çmuara e trashëgiminë kulturore të shkruar që ruhet në arkivin e saj. Vemendjen e tyre e tërhoqi historia e shkrimit dhe botimeve shqipe, identitetit dhe kulturës së kombit shqiptar, prej Mesharit të Buzukut (1555), riprodhuar nga At Justin Rrota, deri në botimet më të fundit dalë nga shtëpitë botuese pak ditë më parë. Po kaq interes bibliotekarët polakë treguan edhe për format e reja të komunikimit me publikun, kur zhvillimi marramendës i teknologjisë të mundëson aksesin e shpejtë në informacion si dhe për përfshirjen e BKSH-së në dy komunitetet më të mëdha virtuale të bibliotekave, “Europeana” dhe “World Digital Library” (“Biblioteka Digjitale Botërore), pjesë e së cilës është edhe Biblioteka Kombëtare e Polonisë.