Ngjarje

Studentë të Shkollës Verore të Osmanishtes njihen me dorëshkrimet e rralla të Bibliotekës Kombëtare

13 Korrik 2018



Studentëtë Fakultetit të Historisë dhe të Filologjisë në Universitetin e Tiranës, të cilët po ndjekin Shkollën Verore të Osmanishtes, u njohën ditën e Premte, më datë 13 Korrik, me fondin e vlerave të rralla të Bibliotekës Kombëtare të Shqipërisë, pjesë e rëndësishme e së cilës janë edhe dorëshkrimet në gjuhën osmane. Dr. Alda Biçoku, specialiste dhe përgjegjëse e Departamentit të Albanologjisë në BKSH, u prezantoi studentëve këtë pasuri arkivore që ruhet me fanatizëm në fondin e bibliotekës. Ky koleksion ka 1193 vepra të dorëshkruara, kryesisht në gjuhët orientale, prej të cilave 683 arabisht, 299 osmanisht dhe 95 persisht. Shumica e tyre janë kopjuar nga kaligrafë të specializuar në Shkodër, Berat, Elbasan, Tiranë, etj.. Koleksioni ka qenë pjesë e bibliotekave të medreseve dhe e bibliotekave të familjeve të mëdha shqiptare siç është dhe Biblioteka e Bushatllinjve, prej të cilës numërohen rreth 150 njësi bibliotekare që mbajnë vulën e sundimtarëve të Shkodrës, Mustafa dhe Karamahmut pashë Bushatlliu. Dorëshkrimet orientale kanë përmbajtje fetare, juridike, historike, gjuhësore e letrare etj. Vlen të veçohen veprat letrare të dorëshkruara në gjuhën shqipe me alfabet arab, sidomos divanet, ku vlerësohen posaçërisht mynsheatet ose krestomacitë dokumentare (përmbledhje letrash private dhe shkresash zyrtare), një pjesë e të cilave me të dhëna për historinë e Shqipërisë dhe të qyteteve të saj, ku mund të përmendim një nga përfaqësuesit më në zë të letërsisë shqipe të bejtexhinjve, është i njohur me emrat Nezim Berati e Ibrahim Nezimi. Pjesë e këtij koleksioni janë edhe veprat e poetëve të mëdhenj të botës orientale. Shumica e dorëshkrimeve orientale u takon shekujve XIII-XIX dhe shquhen për miniaturat në ar dhe dekoracionet e veçanta. Studentët u njohën edhe me mundësinë për t’u thelluar në studimin e osmanishtes përmes njësive në format elektronik, të cilat mund të shfletohen on-line, si dhe njësive të digjituara, përmes këndit të leximit digjital, në Bibliotekën Kombëtare, duke u lejuar studentëve akses të plotë në veprat e këtij fondi me vlera të rralla.