Ngjarje

Biblioteka Kombëtare, homazh shkrimtarit dhe veprimtarit Adem Demaçi

27 Korrik 2018



Në homazh e nderim për shkrimtarin dhe veprimtarin e shquar nga Kosova, Adem Demaçi, i cili u nda nga jeta një ditë më parë në moshën 82- vjeçare, Biblioteka Kombëtare e Shqipërisë çeli më datë 27 korrik ekspozitën homazh “Adem Demaçi (1936–2018)”. Kjo ekspozitë, e cila përmbledh krijimtarinë e letrare të Ademi Demaçit, kontributin e tij të vyer si veprimtar i çështjes kombëtare të Kosovës, por edhe punën e tij të njohur si redaktor dhe përkthyes solli në vëmendjen e publikut tituj si: “Gjarpërinjtë e gjakut : roman” (1983); “Kur zoti harron : tregime” (1990); “Alb Prometeu : roman” (2008); “Keni nderuar popullin tim : (ligjëratë e mbajtur në Parlamentin Evropian) : 10 dhjetor 1991, Strasburg” (2000); “Kosova në udhëkryq : intervista” (2005); etj. Një vend jo të pakët në këtë ekspozitë zënë edhe studimet dhe monografitë mbi veprimtarinë e gjerë politike dhe krijimtarinë letrare të këtij personaliteti, si monografia e Kapllan Resulit “Adem Demaçi” (2000); “Dosja Demaçi : tri proçeset gjyqësore kundër Adem Demaçit : dokumente” (2003) të Hakif Bajrami; “Pse dergjet në burg Adem Demaçi?” (1990) i Xhaferr Shatrit ose “Drama e UÇK dhe e Adem Demaçit : analizë e politikës në UÇK për periudhën 7 Mars 1998 - 2 Mars 1999” (2014) i autorit Dilaver Goxhaj. Fillesat e krijimtarisë së tij letrare nisën në vitet '50 Demaçi në revistën letrare "Jeta e re" drejtuar nga Esad Mekuli, ku dhe botoi për herë të parë romanin e tij të parë “Gjarpërinjtë e gjakut”. Po kaq i vyer është edhe kontributi i tij me artikujt të shumtë në gazetat e kohës, duke shpalosur dimensionin e tij si veprimtar në çështjen e lirisë së Kosovës.

Në vitin 2010 Adem Demaçi është shpallur “Hero i Kosovës”, ndërsa në vitin 2012 nga Presidenti Republikës së Shqipërisë i është akorduar Urdhëri " Nderi i Kombit".