Ngjarje

Seminar mbi psikanalizën frojdiane në Bibliotekën Kombëtare

22 shtator 2018



Në Bibliotekën Kombëtare të Shqipërisë, në bashkëpunim me Rrethin Lakanian Shqiptar, u zhvillua ditën e shtunë, më datë 22 Shtator, seminari mbi psikanalizën frojdiane me temë “A janë teoritë seksuale të fëmijës ende aktuale?”, me pjesëmarrjen e veçantë të dr. Daniel Roy, psikanalist në Bordeaux dhe anëtar i Shoqatës Botërore të Psikanalistëve, si dhe psikanalistë, psikologë dhe studentë. Gjatë këtij seminari, dr. Roy u ndal në teoritë e Frojdit mbi këtë temë publikuar në “Tre ese mbi teorinë seksuale”, e në veçanti në esenë e dytë që trajton ‘seksualitetin fëminor’, në atë që e quajti ‘keqkuptimin e madh’. Sipas tij, “nuk flasim për seksualitet të fëmijës, por seksualitet fëminor, produkt i së cilës është edhe e pavetëdijshmja”.

“Në punën tonë me fëmijët e vegjël, si në çerdhe, në shkollë ose në konsultat e specializuara, ka gjithmonë një fëmijë që na mundon dhe për të cilin mendojmë edhe jashtë punës. Ky fëmijë na habit, na sjell shqetësime, na shkakton angështi. Ne nuk e dimë si do t’ia dalim me të, ai na vë me shpatullat pas muri. Ju propozoj gjatë takimit tonë të ndajmë përvojat tona lidhur me ‘këtë fëmijë’ për të kuptuar më tepër se çfarë e gëzon dhe çfarë e bën të vuajë, nisur nga takimi me të. Në fakt këtu bëhet fjalë që të vihemi në pozicionin ku jemi ne që mësojmë prej tij: këtu qëndron sekreti”, vuri në dukje dr. Roy.

Në 1905, Frojdi shkaktoi skandal me publikimin e teorive të tij. Keqkuptimi madhor midis psikanalizës dhe shoqërisë së epokës nis që këtu. Kjo ndodh pavarësisht saktësimeve që bën Frojdi : jo nuk bëhet fjalë t’i mvishet një kuptim ‘seksual’ çdo ndodhie të jetës : përkundrazi psikanaliza bazohet vetëm mbi atë që thonë subjektet, në rastin tonë fëmijët dhe fëmijët dëshmojnë mbi ‘teoritë’ e tyre të ardhjes në jetë të një fëmije, mbi dallimin e gjinive, etj. Por ky skandal a është sërish aktual në ditët e sotme dhe a interesohen ende psikanalistët mbi teoritë seksuale të fëmijërisë?

A nuk përfshihet seksualja në diskursin e përditshëm nëpërmjet shtegut imagjinar të strukturuar paraprakisht nga lojërat video, filmat vizatimorë, superheronjtë dhe heroinat? Ne do të shqyrtojmë, nëpërmjet Lacan-it, se si psikanaliza konsideron që teoritë, d.m.th. fiksionet e ndryshme që përpunon një subjekt për t’i dalë mbanë urgjencës së jetës, kanë gjithmonë një përmbajtje ‘seksuale’ në thelbin e tyre dhe se ‘seksualiteti’ nuk është gjë tjetër veçse pamundësia e gjuhës për të thënë tërësinë e qenies njerëzore. Në këto kushte, seksualja ndjek rrugë të tjera nga ato të fiksionit, të ‘teorisë’ dhe pushton funksionet e ndryshme të trupit dhe të mendjes, nga kanë zanafillën shumësia e ‘simptomave të reja’ tek fëmija e shekullit tonë : hiperaktiviteti, vëmendja dhe sjellja e turbulluar, çrregullimet konjitive të ndryshme etj. Seminari vijoi me diskutime si dhe paraqitje të rasteve të ndryshme klinike.