Ngjarje

Dita Botërore e Librit në Bibliotekën Kombëtare

 

 

Festimi i 23 Prillit, Ditës Botërore të Librit është bërë tashmë traditë edhe në Shqipëri. E iniciuar në vitin 2001 nga Biblioteka Kombëtare kjo festë shënohet me veprimtari të ndryshme të organizuara nga bibliotekat dhe institucionet e tjera të librit.

Ceremoninë festive të sivjetme në Bibliotekën Kombëtare e nderuan z. Ardian Turku, Ministër i Turizmit, Kulturës, Rinisë dhe Sporteve, përfaqësues të Trupit diplomatik, personalitete të kulturës, miq të librit, gazetarë, botues, bibliotekarë etj.

Dr. Aurel Plasari, drejtor i Bibliotekës Kombëtare, pasi përshëndeti të ftuarit, theksoi rëndësinë e kësaj dite të shënuar të kulturës botërore. “Këtë vit,- tha ai, - Biblioteka Kombëtare ka zgjedhur të përkujtojë në Ditën Botërore të Librit 100-vjetorin e lindjes së Indro Montanellit, figurë e shquar e gazetarisë europiane, por edhe autor, mes të tjerash, i librit “Albania una e mille” (1939), shkruar me dashuri dhe objektivitet të veçantë për Shqipërinë dhe shqiptarët”.

Të pranishmit i përshëndeti z. Ardian Turku, i cili u uroi atyre Ditën Botërore të Librit. Ai e përcaktoi këtë ditë si një pikë takimi që mundëson shkëmbimin e mendimeve për librin, si mjet i rëndësishëm formimi dhe kulturimi. Ai gjeti rastin të falenderojë në këtë ditë njerëzit e letrave për kontributin e dhënë për përhapjen e dijes dhe kulturës nëpërmjet librit.

Duke marrë fjalën, Dr. Flavia Tibaldi, drejtoreshë e Institutit Italian të Kulturës, pasi theksoi bashkëpunimin me Bibliotekën Kombëtare, vlerësoi figurën e Indro Montanellit. Me këtë rast, instituti që ajo drejton ka realizuar një rishtypje të librit të njohur të këtij autori për Shqipërinë.

Të pranishmit në këtë veprimtari ndoqën me interes të veçantë ligjëratën e titulluar “Montanelli, a cent’ anni dalla nascita, fa ancora discutere”, mbajtur nga i ftuari i nderit i kësaj veprimtarie Sandro Gerbi, njëri nga biografët më të njohur të gazetarit të shquar, bashkautor i librave “Montanelli l’anarchico borghese. La seconda vita (1958-2001)” dhe “Lo stregone. La prima vita di Indro Montanelli”. Ligjëruesi u ndal te figura komplekse e Montanellit, te kushtet në të cilat ai u formua dhe punoi si gazetar, por edhe te lidhjet e tij profesionale dhe shpirtërore me Shqipërinë. Në fund Sandro Gerbi iu përgjigj pyetjeve të shumta të auditorit. Atij iu dhurua riprodhimi i një gravure të vjetër me temë nga Shqipëria.

Në mjedisin ku u organizua veprimtaria ishin ekspozuar riprodhime nga pasazhe të artikujve dhe librave të Indro Montanellit që lidhen me Shqipërinë dhe shqiptarët.