Ngjarje

Një takimi i veçantë me filozofin francez Jean Paul Mongin në Bibliotekën Kombëtare

2 Tetor 2018



Me rastin e përkthimit dhe botimit në gjuhën shqipe të serisë për fëmijë “Platonët e vegjël” (Papirus, 2017), të ideuar nga filozofi francez Jean Paul Mongin, të martën, më datë 2 tetor, në Sallën Franceze të Leximit në Bibliotekën Kombëtare, u zhvillua një takim i veçantë me filozofin dhe botuesin Mongin me mësues të filozofisë së shkollave të mesme të Tiranës. Ky takim vjen si bashkëpunim i ngushtë i Ambasadës Franceze në Tiranë me Bibliotekën Kombëtare të Shqipërisë. Duke shprehur kënaqësinë që kjo seri ka ardhur edhe në gjuhën shqipe, Jean Paul Mongin ndau me të pranishmit emocionet dhe përvojën e tij, si dhe idenë që i dha jetë këtyre botimeve. Gjatë fjalës së tij, z. Mongin u shpreh se “janë të shumta pyetjet filozofike që na drejtojnë fëmijët dhe të rinjtë, të cilat sigurisht kërkojnë një përgjigje. Përballja me to është sa e vështirë po aq edhe e bukur dhe tërheqëse”.

Duke rrëfyer mbi idenë që i dha jetë krijimit të tyre Mongin theksoi se “njohja e filozofisë dhe filozofëve do të ishte shumë më e lehtë përmes njohjes së historisë së jetës së filozofëve. Nëse do të nisim me Platonin, për të vijuar më pas me të gjithë filozofët e tjerë, mendoj se të gjithë kontributet e tjera filozofike janë thjesht shënimet në fund të faqes që bëri Platoni. Ndaj të gjithë janë pak ‘platonë të vegjël’ duke shtuar më tej se “këto botime u drejtohen lexuesve nga 9 deri 99 vjeç. Ato janë një qasje tjetër me filozofinë dhe me filozofët e mëdhenj si Platoni, Sokrati, Epikuri, Diogjeni, Herakliti, Agustini, Dekart, Kant, Lao-Ceu, etj.. Një nga format e afrimit me filozofinë është qasja fiksionale. Krijimi i një historie të trilluar, ku janë huazuar idetë filozofike të filozofëve, është një nga format e drejtpërdrejta të përfshirjes. Historitë e ilustruara i ndihmojnë fëmijët në këto narracione filozofike”.

Gjatë këtij bashkëbisedimi u shkëmbyen mendime për përcjelljen e ideve filozofike dhe njohjen e filozofëve dhe veprave të tyre te fëmijët dhe të rinjtë. Gjetja e qasjeve te ndryshme me filozofinë, qoftë përmes historisë së jetës së filozofëve, përmes artit, përmes fiksionit etj., të cilat sqarojnë dhe shtjellojnë idetë filozofike.

Jean Paul Mongin, i diplomuar në filozofi në Universitetin e Sorbonës, është ideatori dhe botuesi i serisë “Platonët e vegjël” në vitin 2009, si një formë e re e qasjes së fëmijëve dhe të rinjve me filozofinë. Jean Paul Mongin është fitues i një sërë çmimesh letrare në Francë. Kjo seri, botuar fillimisht në Francë, është përkthyer dhe botuar më pas në shumë gjuhë të botës. Ajo vjen në shqip përmes përkthimit mjeshtëror të Saverina Pashos dhe Kleopatra Koleka.