Ngjarje

Tirana Lexon 2018 sjell kuartetin letrar në Bibliotekën Kombëtare

24 Tetor 2018



Në Sallën Franceze të Leximit në Bibliotekën Kombëtare, në bashkëpunim me Institutin për Demokraci, Media & Kulturë (IDMC), u zhvillua të mërkurën, datë 24 tetor, takimi ‘Kuartet letrar’, pjesë e fushatës së leximit “Tirana Lexon 2018”, me të ftuar dhe kontributin e studiuesve dhe kritikëve Jonila Godole, Agim Baçi, Ledia Dushi dhe Beti Njuma, ku u diskutuan dhe u lexuan mbi veprat dhe autorë bashkëkohorë si “Kohë e pamjaftueshme” i Helena Kadare; “Valsi i lumturisë” i Ylljet Aliçkës; “Më kujtohet” i Ylli Demneri  dhe “A është vallë njeri?” i shkrimtarit italo-hebre Primo Levi. Në këtë veprimtari merrnin pjesë studentë të Fakultetit të Historisë dhe të Filologjisë si dhe anëtarët e rrethit letrar të shkollës së mesme “Sulejman Elezi” në Tiranë. Kuarteti letrar është një risi në diskutimin dhe leximin e letërsisë, i cili bashkon gazetarë, profesorë, kritikë e dashamirës të artit në prezantimin dhe diskutimin e veprave letrare që kanë lidhje me temën. Ata diskutojnë me njëri-tjetrin përballë një publiku në sallë dhe komentojnë, promovojnë e analizojnë veprat. Sipas Jonila Godoles, përkthyese dhe pedagoge e gazetarisë dhe shkencave të komunikimit dhe drejtoreshë e IDMC, “ky format synon të nxisë debatin profesional mbi librat dhe vendosjen në fokus më shumë të veprës së autorit”.

Tirana Lexon është një nismë letrare publike, e cila nisi si një maratonë leximi në kafenetë letrare, shkolla, biblioteka nga IDMC-ja në partneritet me Ministrinë e Kulturës si dhe institucione të tjera kulturore. Bashkë me të rinjtë dhe qytetarët lexojnë edhe personazhe të njohur të skenës kulturore, mediatike dhe politike të vendit. Në dallim nga sezonet e kaluara, këtë vit, Tirana Lexon 2018 vjen me disa risi, së pari në zgjedhjen e një tematike të saj: Tirana Lexon për të kujtuar. Këtë vit në qendër të aktiviteteve ka qenë tema “Identiteti dhe kujtesa”. Identiteti krijohet në një proces autobiografik, ku ndërthuren kujtimet dhe rrëfimet që kanë shoqëruar jetën tonë. Çdo përpjekje për t’i dhënë kujtimeve, përvojave të jetuara, synimeve, anktheve dhe shpresave tona një formë të caktuar, për t’i ri-konstruktuar dhe ri-dimensionuar ato, është pjesë e pandashme e këtij procesi. Autorët e pranishëm gjatë ditëve të Tirana Lexon 2018 ndanë me publikun pikërisht qasjet e tyre autobiografike në veprën e tyre dhe pengesat e hasura në procesin identifikues në të shkuarën e deri më sot.