Ngjarje

SHQIPËRIA BIBLIOTEKARE NË BIBLIOTEKËN DIGJITALE BOTËRORE

 

 




Biblioteka Kombëtare e Shqipërisë (BKSh) ftohet nga UNESCO-ja dhe Biblioteka e Kongresit Amerikan për t’u përfshirë si partnere në projektin Biblioteka Digjitale Botërore. Ftesa vjen mbas përfshirjes së BKSh, me statusin e partnerit të plotë, në Bibliotekën Europiane nëpërmjet Memorandumit të Mirëkuptimit nënshkruar më 18 shkurt 2008 mes Dr. Elisabeth Niggemann, drejtoreshë e Konferencës së Bibliotekave Kombëtare të Europës, dhe Dr. Aurel Plasari, drejtor i BKSh.

I ftuar në Selinë e UNESCO-s, më 21 prill të këtij viti drejtori i BKSh nënshkroi pjesëmarrjen shqiptare në këtë Projekt gjatë ceremonisë së organizuar nga z. James H. Billington, President i Bibliotekës së Kongresit Amerikan, dhe z. Koïchiro Matsuura, Drejtor i Përgjithshëm i UNESCO-s.

Biblioteka Digjitale Botërore (BDB) është nismë e z. James H. Billington, propozuar zotit Koïchiro Matsuura, në qershor të vitit 2005.

Si një portal në linjë (online) i përbashkët, BDB mundëson lehtësisht qasjen në trashëgiminë kulturore të digjitalizuar - në kultura e gjuhë të ndryshme - për publikun kulturor mbarëbotëror. Vetë portali synon t’u ofrojë internetistëve shërbim falas dhe qasje në shumë gjuhë të koleksioneve të digjitalizuara, si: libra të rrallë, dorëshkrime, harta, regjistrime zanore, partitura muzikore, filma, video etj. Projekti parashikon një përfshirje të bibliotekave kombëtare dhe institucioneve kulturore nga mbarë bota, si dhe të organizmave ndërkombëtarë: UNESCO dhe IFLA (International Federation of Institutions and Library Association).

Përfshirja e Bibliotekës Kombëtare në projektin global të Bibliotekës Digjitale Botërore, do të mundësojë qasjen në këtë portal të përbashkët përmes rrjetit botëror në informacionin dhe koleksionet e rralla të digjitalizuara të BKSh.

Promovimi i kësaj ngjarjeje të rëndësishme për bibliotekat dhe kulturën shqiptare u bë më 27 prill 2009 në një nga mjediset e Bibliotekës Kombëtare. Dr. Aurel Plasari në fjalën e rastit nënvizoi faktin që Shqipëria ishte ndër vendet e grupit të parë që mori ftesën t’u përfshirë me statusin e partnerit të plotë në këtë organizim mbarëbotëror. Ai gjeti rastin të përgëzojë dhe të falënderojë sektorët shkencorë, veçanërisht atë të teknologjive të reja, që me punën e tyre të gjatë dhe të përkushtuar përgatitën kushtet për këtë përfshirje. Ai njëkohësisht informoi të pranishmit se Biblioteka Kombëtare ka kohë që punon për digjitalizimin e vlerave të rralla të koleksioneve të veta (koleksioni i revistës “Albania” të Faik Konicës, “Historia e Skënderbeut” e Marin Barletit dhe “Letrat e Papa Piut II për Kuvendin e Mantovës” inkunabël e vitit 1473, botimi më i vjetër i koleksioneve të Bibliotekës Kombëtare). Drejtori i Bibliotekës Kombëtare u transmetoi të pranishmëve edhe urimet që z. Sali Berisha, kryeministër i Shqipërisë, i ka dërguar me këtë rast Bibliotekës Kombëtare.

Duke marrë fjalën në këtë promovim, z. Ardian Turku, ministër i Turizmit, Kulturës, Rinisë dhe Sporteve, shprehu kënaqësinë të ndodhet në një veprimtari të tillë, e cila kurorëzon një punë të jashtëzakonshme dhe me vizion për përgatitjen e stafit dhe të specialistëve për t’u angazhuar në procese të tilla të rëndësishme bashkëkohore. Ai e cilësoi Bibliotekën Kombëtare si institucion elitar të kulturës shqiptare, duke falënderuar Dr. Plasarin për drejtimin e përkushtuar dhe vizionar të institucionit që drejton. “Jam i informuar,- tha z. Ardian Turku,- për ecurinë e punëve në Bibliotekën Kombëtare, si dhe për përpjekjet që ju bëni për integrimin e trashëgimisë sonë të shkruar në rrjedhat botërore”.