Ngjarje

BKSH jep Çmimin Kombëtar të Bibliofilisë “Lumo Skendo” për vitin 2017

14 Dhjetor 2018



Biblioteka Kombëtare e Shqipërisë, organizoi ditën e premte, më datë 14 dhjetor, ceremoninë e dhënies së Çmimit Kombëtar të Bibliofilisë “Lumo Skendo” për vitin 2017, me pjesëmarrjen e akademikë e studiues nga Shqipëria e Kosova, specialistë të Bibliotekës Kombëtare, përfaqësues të medias, etj. Ceremonia u zhvillua në sallën elegante e precioze të BKSH-së, e cila mban emrin “Lumo Skendo”.

Në fjalën e saj përshëndetëse drejtoresha e BKSh-së, znj. Persida Asllani, u shpreh se “këtë vit, dhënia e këtij çmimi përmbyll me sukses një varg veprimtarish kushtuar figurës dhe personalitete të kulturës Mid’hat Frashëri, apo “Lumo Skendo”, pseudonimi letrar me të cilin ai u identifikua kulturalisht gjatë gjithë krijimtarisë dhe veprimtarisë së tij letrare e botuese ashtu edhe patriotike, shkencore e diturore”. Biblioteka Kombëtare pati nderin të çelë veprimtaritë kushtuar veprës së tij duke risjellë në duar të studiuesve dhe lexuesve të sotëm revistën “Diturija” në një botim bibliofilik e anastatik. Kontributit të Lumo Skendos si themelues të kësaj reviste “Monument kulture” i trashëgimisë sonë të përbashkët iu kushtuan dy konferenca shkencore të organizuara nga dy Bibliotekat Kombëtare të Shqipërisë dhe të Kosovës si dhe një bibliografi e hartuar posaçërisht për revistën “Diturija” nga specialistët e BKSH.

Me Çmimin Kombëtar të Bibliofilisë “Lumo Skendo” për vitin 2017 u vlerësua Shtëpia botuese “Kuteli” me motivimin: për botim e hijshëm e nostalgjik, ilustruar grafikisht nga mjeshtri Gazmend Leka, të përmbledhjes me rrëfenja “Tregime të moçme shqiptare”, një prej veprave më mbresëlënëse e më të dashura të letërsisë shqipe të çdo moshe, trashëgim monumental nga pena e rrëfimtarit mjeshtëror Mitrush Kuteli.

Drejtoresha e Bibliotekës Kombëtare, znj. Asllani, i dorëzoi çmimin znj. Atalanta Pasko, themeluese e Shtëpisë botuese “Kuteli” dhe bijë e shkrimtarit Mitrush Kuteli. Znj. Pasko, pasi falenderoi për “vlerësimin e dhënë me akordimin e këtij çmimi kaq domethënës” u shpreh se “në këtë botim janë bashkuar disa vlera, ajo grafike dhe e ilustrimit me rrëfimtarinë dhe tregimet, por edhe përkushtimi dhe puna e palodhur e Elzana Agollit dhe shtypshkronjës “Mali Pleshti”, që solli këtë botim cilësor”.

Edicioni i vitit 2017 i përmbledhjes “Tregime të moçme shqiptare” nga shtëpia botuese “Kuteli” është një botim special që përkon edhe me 110-vjetorin e lindjes së shkrimtarit.

Çmimi Kombëtar i Bibliofilisë “Lumo Skëndo” nga viti 2013 i është besuar Bibliotekës Kombëtare të Shqipërisë. I akorduar për herë të parë në vitin 2006, është çmimi i vetëm që nxit dhe mbështet cilësinë estetike të botimeve shqiptare. Ky çmim i shërben vlerësimit dhe stimulimit të botimeve me vlera të spikatura bibliofilike dhe intelektuale, nëpërmjet evokimit të personalitetit të kulturës dhe të mendimit shqiptar Lumo Skëndo (Mit’hat Frashëri), veçanërisht si themelues i bibliofilisë shqiptare.