Ngjarje

Trajnim dy-ditor në Bibliotekën Kombëtare të Shqipërisë

12-13 Dhjetor 2018



Në Sallën Franceze të leximit në Bibliotekën Kombëtare të Shqipërisë, në bashkëpunim me Ambasadën Franceze në Shqipëri, u zhvillua më datë 12 dhe 13 dhjetor trajnimi me temë “Veprimtaria kulturore në bibliotekat publike franceze”, drejtuar nga bibliotekari dhe specialisti francez i bibliotekonomisë, David Picard, me pjesëmarrjen e bibliotekarëve të bibliotekave publike dhe universitare në vend si dhe specialistëve që ndjekin Shkollën Kombëtare të Bibliotekonomisë pranë BKSH. Lektori francez, pas një prezantimi të detajuar të rrjetit dhe funksionimit të bibliotekave publike në Francë, ndau me pjesëmarrës përvojën franceze në organizimin dhe zhvillimin e aktiviteteve kulturore, sfidat më të reja me të cilat përballet sistemi bibliotekar në epokën e zhvillimit marramendës të teknologjisë. Gjatë trajnimit pjesëmarrësit shkëmbyen ide mbi organizimin e aktiviteteve, të cilat nxisin dhe afrojnë publikun me leximin dhe bibliotekat, si dhe diskutuan mbi problematika të ndryshme që ndeshin gjatë punës së tyre.

Ky trajnim dy-ditor erdhi si rezultat i bashkëpunimit të ngushtë dhe të vazhdueshëm të Bibliotekës Kombëtare të Shqipërisë dhe Ambasadës franceze në Tiranë.