Ngjarje

“Natë në bibliotekë”, ndal në Bibliotekën Kombëtare

20 Dhjetor 2018



Biblioteka Kombëtare e Shqipërisë, iu bashkua nismës “Dhuro një libër, dhuro një udhëtim!” organizuar nga Hemingway Fan Club, përmes aktivitetit “Natë në Bibliotekë” që u zhvillua të enjten pasdite, më datë 20 dhjetor, në Sallën Franceze të leximit në BKSH-së, i konceptuar si një mbrëmje artistike, ku të pranishmit u mblodhën së bashku për të ndarë të njëjtin pasion, dashurinë për librin, letërsinë shqipe dhe të huaj. Si një udhëtim përmes librit, muzikës, eksperiencës teatrale anëtarët e Hemingway Fan Club, i dhanë jetë një nga personazheve unik të letërsisë botërore, Dorian Greit. Nën petkun e personazheve të Oscar Wilde, përmes leximeve të pjesëve të zgjedhura nga “Portreti i Dorian Greit”, recitimeve dhe interpretimit, mes tingujve live të muzikës xhaz dhe asaj klasike, personazhet e librit morën jetë duke krijuar një atmosferën të veçantë dhe emocionuese. Për të katërtin vit radhazi Hemingway Fan Club organizon maratona të shfaqjeve artistike, duke bashkuar letërsinë, muzikë, artet pamore dhe skenike. Këtë vit, nën sloganin “Dhuro një libër, dhuro një udhëtim!”, maratona e veprimtarive 4-ditore, shërbeu si një nismë për të nxitur dhurimin e librave për nxënësit e Shkollës së Mesme të Bashkuar “Kasallë” në Zall Herr, Tiranë. Fondi i mbledhur nga dhurimet, të cilat përfshinin botime në gjuhë shqipe por edhe të huaj, i erdhi në ndihmë pasurimit të fondit të bibliotekës së shkollës.