Ngjarje

Takimi “Mbrëmja e Ideve”, në Bibliotekën Kombëtare të Shqipërisë

31 janar 2019



Në Bibliotekën Kombëtare të Shqipërisë, në bashkëpunim me Ambasadën Franceze në Tiranë, u zhvillua të enjten mbasdite, më datë 31 janar, takimi “Mbrëmja e Ideve” me pjesëmarrjen e Ambasadores së Francës, znj. Christina Vasak, të ftuarin e veçantë, z. Frédéric Petit, deputet i qarkut të 7-të të francezëve që jetojnë jashtë Francës, znj. Pauline Couteau, pedagoge e filozofisë në Universitetin e Bourgogne, z. Mark Marku, shef i departamentit të Gazetarisë dhe të Komunikimit në Universitetin e Tiranës, znj. Briseida Mema, korrespondente e AFP-së në Tiranë, si dhe pedagogë, studiues, studentë, etj.

I konceptuar si një debat mbi temën e kufijve, “Mbrëmja e Ideve” është një takim i rëndësishëm intelektual dedikuar mendimit bashkëkohor dhe ndarjes ndërkombëtare të ideve, i cili zhvillohet në vendet frankofone, duke mbledhur pjesëmarrës të fushave dhe profesioneve të ndryshme për të diskutuar mbi marrëdhënien me kufijtë. Ky takim, i drejtuar nga korrespondentja e AFP-së, znj. Briseida Mema, solli kontributi e pedagogëve Pauline Couteau dhe Mark Marku, që ndanë me të pranishmit idetë dhe mendimet e tyre mbi një temë universale, si kufijtë, si dhe mbi sfidat e epokës sonë.

Profesoresha e filozofisë Pauline Couteau, duke pasur si ‘pikënisje’ të diskutimit të saj marrëdhënien midis grekëve dhe romakëve në antikitet në pellgun e Mesdheut u shpreh se “kufijtë e shtetit mbulojnë realitete shumë të ndryshme, duke përfshirë atë etimologjik apo edhe ushtarak. Kufiri është në të njëjtën kohë një linjë e gjerë, materiale dhe jomateriale”. Më tej znj. Couteau vijoi duke shpalosur panoramën e plotë të këtij koncepti dhe perceptimin e tij, prej antikitetit deri në shekullin XXI, si dhe marrëdhëniet që njerëzit kanë pasur me të. Në kuptimin e parë ose figurativ, kufijtë kanë qenë dhe vazhdojnë të jenë në zemër të agjendave politike dhe atyre shoqërore, dhe kjo, në rastin kur bëhet fjalë për t’i mbyllur ose për t’i kapërcyer ato: kufij të shkelur, kufij të nxehtë, kufij midis popujsh, kufij fetarë, gjuhësorë, kulturorë. Cila është marrëdhënia jonë me kufijtë në shekullin e XXI ?

Ndërsa profesori i departamentit të Gazetarisë dhe Komunikimit, Mark Marku, e cilësoi si një temë “sfiduese që shtron pyetjet pafund”. Duke sjellë ndër mend qasjen e Malcolm Andersonit mbi këtë temë, prof. Marku theksoi se “kufijtë janë një proces politik sepse ato kanë qenë instrumente të politikës së shteteve; se politika dhe praktika e shtetit është e kufizuar nga kontrolli ‘de facto’ që një shtet ushtron mbi kufijtë e tij; sepse kufijtë në modernitet janë shenjë e identitetit të popujve që jetojnë brenda kufijve, kryesisht e identitetit kombëtar. Në këtë kuptim ato janë pjesë e besimeve dhe e miteve për unitetin e popujve dhe për unitetin natyror të territorit”. Ai vuri në dukje se “komunitetet politike të imagjinuara i tejkalojnë kufijtë e shteteve dhe mund të zhvillohen me një shpejtësi të çuditshme gjatë luftërave, revolucioneve dhe turbullirave politike. Rasti i shqiptarëve është rast ‘par excellence’ në këtë drejtim. Në rastin shqiptar, këto ndryshime kanë ardhur në mënyrë të papritur, sa kanë shkaktuar një zhvendosje tektonike mentale mbi atë çfarë ishte përkufizuar më parë si identitet kombëtar shqiptar”.

Takimi vijoi me diskutimet dhe ndërhyrjet e të pranishmëve në këtë mbrëmje shkëmbimi idesh dhe pikëpamjesh.