Ngjarje

Takim me shkrimtarin francez Cédric Gras në Bibliotekën Kombëtare

27 mars 2019



Në Sallën Franceze të Leximit në Bibliotekën Kombëtare të Shqipërisë, në bashkëpunim me Aleancën Franceze në Tiranë, në kuadër të aktiviteteve të Pranverës së Frankofonisë 2019 në Shqipëri, të mërkurën pasdite, më datë 27 mars, u zhvillua takimi letrar me shkrimtarin francez Cédric Gras, me pjesëmarrjen e Ambasadores së Francës, znj. Christina Vasak, shkrimtarë, studiues, studentë dhe nxënës frankofonë, etj. I pasionuar pas udhëtimeve, ai prezantoi për të pranishmit romanit të tij të fundit “Sezonet e udhëtimit”. Nga Tibeti në Shqipëri, nga Pakistani në Mongoli dhe duke përshkuar gjithë vendet e Euro-Azisë, Cédric Gras flet pikërisht për udhëtimin. Diçka e zakonshme për të rinjtë në perëndim, siç ishte edhe ai vetë, në epokën e artë të eksplorimit të një bote të ëndërruar, por që brezi i tij e gjeti të transformuar, udhëtimi është edhe sinonim i aventurës, poezisë, vetmisë ose mësimit të një gjuhe. Si ta rizbulojmë Tokën në shekullin e XXI?

Gjatë bashkëbisedimit në gjuhën franceze mbi veprën e tij më të fundit, shkrimtari francez kujton se “pasi ka arritur në një moshë kur ai e di se nuk do të udhëtojë në të njëjtën mënyrë, kuptojmë se udhëtimi është i shumëfishtë, i formuar nga koha, mosha dhe udhëtari. Në jetën tuaj, ju nuk udhëtoni në të njëjtën mënyrë, nuk bëjmë përsëri të njëjtin udhëtim. Tanimë ai është një udhëtim drejt njohjes”. Profesioni si gjeograf ka ndikuar në këndvështrimin e tij mbi udhëtimin. “Kjo disiplinë më ndihmoi të shikoj botën e kohës sonë, ta kuptoj atë. Ndryshe nga udhëtimet bashkëkohore që konsiderohen sipërfaqësore preferoj takimet autentike që të lejojnë të zhytësh veten në kultura dhe qytetërime të huaja”, vuri në dukje ai, vuri në dukje ai, duke sjellë në veprën e tij narrativën e udhëtimit, si një ilustrim të reflektimeve dhe kujtimeve të tij.

Cédric Gras ka lindur më 1982 në Paris. Studimet e tij për gjeografi i kanë ndërthurur me udhëtimet në tokat e largëta dhe pasionin për alpinizmin. Ka jetuar 5 vjet në Rusi, sidomos në Siberi, ku drejtonte Aleancën Franceze në Vladivostok. Cédric Gras ka qenë në ndër finalistët e “Prix Bouvier” në vitin 2014. Ky takim vjen si bashkëpunim i ngushtë i Ambasadës Franceze në Tiranë me Bibliotekën Kombëtare të Shqipërisë, duke sjellë më parë për publikun kryeqytetas emra të njohur si shkrimtarin François-Henri Désérable, filozofin Jean Paul Mongin, astrofizikantët Ludwik Dobrzynski dhe Daniel Denigri si dhe shkrimtarin dhe orientalistin, Mathias Enard.