Ngjarje

Dita Ndërkombëtare e Librit për Fëmijë në Bibliotekën Kombëtare

2 prill 2019



Nxënës të klasës së 2-të të shkollës 9-vjeçare “Mihal Grameno” në Tiranë lexuan së bashku me drejtoreshën e Bibliotekës Kombëtare, Persida Asllani, libra nga biblioteka fëminore, përmes një atmosfere ilustruese nga bota e përrallave dhe librit, si dhe me personazhet letrarë më të njohur e të dashur për fëmijë. Në këtë takim me miqtë e vegjël të librit, zhvilluar në kuadër të 2 Prillit, Ditës Ndërkombëtare të Librit për Fëmijë, drejtoresha e BKSH-së i ftoi fëmijët të zbulojnë së bashku, përmes leximit të autorëve të letërsisë fëminore, botën magjike që sjell shkrimtari Betim Muço me përrallat “Mësimet e natës” si dhe të ndjekin aventurën e mrekullueshme të “Shigjetës së kaltër” të shkrimtarit italian Gianni Rodarit. Miqtë e vegjël të librit ndanë me njëri-tjetrin kënaqësinë e leximit të pjesëve të zgjedhura prej tyre nga libri “Përralla me zana” si dhe disa nga përrallat e preferuara të Andersen-it. Prej vitit 1967, data 2 prilli, ditëlindja e një prej shkrimtarëve më të dashur për fëmijë, Hans Christian Andersen, është shpallur si ditë e veçantë e nxitjes dhe inicimit të dashurisë së leximit te lexuesit e vegjël.

Sa bukur është të lexosh e të takohesh për një libër! Por edhe më bukur kur librat fëmijëve ua lexojnë prindërit! Do të takohemi sërish …