Ngjarje

Biblioteka Kombëtare e Shqipërisë pjesëmarrëse në Javën e Bibliotekave në Kosovë

10-14 prill 2019



Biblioteka Kombëtare e Shqipërisë mori pjesë në edicionin e XVII-të të Javës së Bibliotekës, organizuar nga Biblioteka Kombëtare e Kosovës “Pjetër Bogdani”, me pjesëmarrjen e Ministrit të Kulturës, Rinisë dhe Sporteve, z. Kujtim Gashi, Kryetari i Parlamentit të Kosovës, z. Kadri Veseli, rektori i Universitetit të Prishtinës, Prof. Dr. Marian Dema, drejtorja e Bibliotekës Kombëtare të Shqipërisë, Prof. Dr. Persida Asllani, me pjesëmarrjen e veçantë të dr. Robert Montoya, profesor i Shkencës së Bibliotekonomisë dhe Informacionit në Universitetin Indiana Bloomington, si dhe bibliotekarëve të rrjetit kombëtar të Kosovës dhe specialistëve të Bibliotekës Kombëtare të Shqipërisë, studiues, shkrimtarë, botues, përfaqësues të kulturës e të politikës, pedagogë, studentë dhe lexues. Java e Bibliotekës u zhvillua në Prishtinë nga data 10 deri më 14 prill me temë “Programi kombëtar i arsimimit bibliotekar” dhe gjatë saj promovohen dijet dhe sfidat e bibliotekonomisë si edhe aktivitetet kushtuar librit e kulturës së leximit. Kjo Javë shënon edhe vazhdimin e bashkëpunimit të ngushtë midis Bibliotekës Kombëtare të Shqipërisë dhe Bibliotekës Kombëtare të Kosovës “Pjetër Bogdani”.

Në fjalën e hapjes së kësaj Jave, drejtori i Bibliotekës Kombëtare, z. Fazli Gajraku, u shpreh se “Java e Bibliotekës, përveç që hap debatin për të trajtuar njohuritë tona e dijet bibliotekare, përvojat tona të përbashkëta dhe të veçanta, është dhe një festë vjetore që përpiqet të jap mesazhin - pse bibliotekat kanë rëndësi; një festë që flet për kultivimin e kureshtjes për t’i përdorur bibliotekat; për të treguar se sa shumë dije ruhet brenda tyre nga ajo që nuk e dimë e sa mundësi ka për ta bërë përdoruesin të kënaqur për atë që kërkon e gjen”. Duke falënderuar kryetarin e Parlamentit të Kosovës për mbështetjen dhe kontributin e dhënë në hapjen e Bibliotekës Digjitale në Kosovë z. Gajraku shtoi se “kjo bibliotekë do të shërbejë si sistem ku do të ruhet në aspektin afatgjatë trashëgimia e shkruar, intelektuale dhe kulturore e Kosovës, duke i respektuar të gjitha standardet ndërkombëtare të ruajtjes”.

Drejtorja e Bibliotekës Kombëtare të Shqipërisë, znj. Persida Asllani, përshëndeti iniciativat e ndërmarra të Bibliotekës Kombëtare të Kosovës, të çuara përpara me përkrahjen e bashkëpunëtorëve, dhe ndër të tjera shtoi: “Është detyrimi ynë i përbashkët t’u përgjigjemi me nivel sa më të lartë profesional akumulimit, ruajtjes e restaurimit të pasurisë sonë të shkruar, po aq sa edhe përpunimit, sistemimit, publikimit dhe qarkullimit të informacionit që ato paraqesin për përdoruesit e bibliotekave në nivel jo thjeshtë shtetëror por kombëtar, rajonal e botëror”. Ajo më tej u shpreh se “sfidat e dijes dhe profesionit të bibliotekonomisë janë karakterizuar gjithmonë nga një dinamikë thuajse marramendëse: ato jo vetëm shoqërojnë ndryshimet dhe evoluimin në jetën shoqërore e në qasjen e informacionit, por gjithnjë e më shpesh, i paraprijnë dhe shndërrohen në prijëse të rëndësishme në orientimet e shoqërive demokratike drejt librit, informacionit, dijes e diversitetit”.

Iniciativa e Bibliotekës Kombëtare të Kosovës për t’i kushtuar vëmendje të posaçme konceptit të një Programi Kombëtar të Arsimimit Bibliotekar shenjon para së gjithash një stad të ri në të cilin përfshihen kjo bibliotekë por po aq natyrshëm edhe Biblioteka Kombëtare e Shqipërisë. Formimi dhe trajnimi bibliotekar në funksion të krijimit të një trupe të mirëfilltë profesionale është një domosdoshmëri e përhershme në kushtet e zhvillimi të rrjetit të Bibliotekave në Kosovë dhe në Shqipëri.

Në përfundim të ceremonisë së hapjes Javës, u bë përurimi i Bibliotekës Digjitale të Bibliotekës Kombëtare të Kosovës, duke u digjitalizuar, në mënyrë simbolike, faqet e para të njësisë së pare të Gazetës Rilindja, të 12 shkurtit të vitit 1945.

Gjatë ditëve në vijim, specialistet më të mira të Bibliotekës Kombëtare prezantuan përvojat e mësimdhënies në Shkollën Kombëtare të Bibliotekonomisë në Tiranë, interpretuan sfidat në ndërtimin e një kurrikule të re e bashkëkohore si dhe vizionin për themelimin e një Shkollë të përbashkët profesionale.