Ngjarje

Biblioteka Kombëtare çel aktivitetet kremtuese në Ditën Botërore të Librit dhe të Drejtës së Autorit

23 - 26 Prill 2019



Biblioteka Kombëtare e Shqipërisë çeli të martën, më datë 23 prill, Javën e veprimtarive kulturore që do të zhvillohen në kuadër të Ditës Botërore të Librit dhe të Drejtës së Autorit, përmes takimit të Ministres së Kulturës, znj. Elva Margariti, me specialistët e Bibliotekës Kombëtare. Duke i shprehur mirëseardhjen në emër të të gjithë stafit të Institucionit qendror të librit në vend, drejtoresha Persida Asllani shprehu nevojën për një bashkëpunim sa më të koordinuar ndërinstitucional në mbështetje të Bibliotekës Kombëtare, por edhe të rrjetit të bibliotekave në vend, si hapësirat më cilësore të dijes, të informimit, të leximit të letërsisë dhe zhvillimit shpirtëror, mendor e estetik të qytetarëve. Gjatë bashkëbisedimit me specialistët e bibliotekës Ministrja e Kulturës, znj. Elva Margariti, theksoi vëmendjen e veçantë jo vetëm institucionale por edhe personale “për një zgjidhje afatgjatë e cilësore të situatës në të cilën gjendet Biblioteka Kombëtare aktualisht”.

“Kemi filluar me disa hapa që duken të vegjël. Jemi vënë në kontakt me ekspertë, të cilët po na ndihmojnë për të hartuar nevojat teknike, që përkthehen në nevoja hapësirash. Kemi identifikuar dhe një hapësirë të mundshme, ku mund të ndërtohet biblioteka e re. Duke qenë arkitekte, të gjithë presin nga unë diçka të prekshme. Si e tillë, unë mund të them që është diçka e realizueshme, por aspekti ekonomik është i vetmi faktor që ka penguar deri tani. Por shpresojmë, që përmes partnerëve të ndryshëm, që na janë afruar dhe mbështetur në këtë nismë, tek e cila po ngul këmbë fort, në vizitën e ardhshme në bibliotekë, të vij me marrëveshje konkrete”, theksoi ministrja Margariti, e cila shprehu admirim për punën e gjithë punonjësve të Bibliotekës Kombëtare, “E vlerësoj shumë punën e të gjithëve, përkushtimin dhe dashurinë që tregoni çdo ditë në punën tuaj. Në sytë e mi jeni heronj, pasi shoh se çfarë sforcoje jeni duke bërë për të tejkaluar problematikat dhe vështirësitë, me të cilat përballeni çdo ditë”.

Më tej ministrja premtoi “krijimin e Agjencisë Kombëtare të ISSN-së pranë Bibliotekës Kombëtare”. “Pak ditë më parë jam vënë në dijeni të mungesës së këtij elementi në bibliotekën tonë, por që e tejkalon atë, pasi prek institutet, universitetet etj., që do të mund të na përfaqësonin në arenën ndërkombëtare, në fushën e studimeve dhe shkencës”, nënvizoi ministrja Margariti. Krijimi i Agjencisë Kombëtare të ISSN-në, e cila do të pajisë me numrin ISSN, të gjitha botimet periodike si: gazeta, revista, - përfshirë edhe ato shkencore, - në format të shtypur ose në formë elektronik, si një domosdoshmëri në fushën e botimeve do të ndihmonte jo vetëm bibliotekat në kryerjen e përshkrimin bibliografik të periodikut sipas standardeve ndërkombëtare dhe shkëmbimin e të dhënave në rrjetet globale të informacionit por edhe botuesit për tregtimin më të mirë të botimeve të tyre brenda apo jashtë vendit si dhe botën akademike - shkencore në përpjekjet integruese euro-atlantike të botimeve të tyre kërkimore e shkencore.

Në këtë ditë të veçantë, Fondi i vlerave të rralla të Bibliotekës Kombëtare u pasurua me dorëshkrimin e përkthimit nga latinishtja të veprës madhore “Gjeorgjikat” të Virgjilit, sjellë në gjuhën shqipe nga mjeshtëri Mark Dema, dhuruar prej birit të tij z. Alfred Dema në kuadër të Ditës Botërore të Librit. Fondi i dorëshkrimeve në BKSH numëron rreth 1189 vepra të dorëshkruara, kryesisht në gjuhët orientale (arabisht, osmanisht dhe persisht), shumica e të cilave janë kopjuar nga kaligrafë të specializuar në Shkodër, Berat, Elbasan, Tiranë etj. Shumica e dorëshkrimeve orientale u takon shekujve XIII-XIX. Ato shquhen për miniaturat në ar dhe dekoracionet. Pjesë e koleksionit janë edhe disa dorëshkrime në gjuhët perëndimore, ndër të cilat me vlerë të veçantë për Shqipërinë është ditari i albanologut hungarez Franc Nopça “Albania Notizbücher” në 6 vëllime, shkruar gjatë viteve 1905-1909, 1913 etj. Nga dorëshkrimet greqisht, i rrallë dhe i rëndësishëm është kodiku për Shën Nikodhimin nga Berati, i dorëshkruar në fillim të shek. XVIII. Disa nga këto vlera të çmuara të fondit të BKSh-së, u ekspozuan për publikun.

Në kuadër të veprimtarive që u zhvilluan në kryeqytet në Ditën Botërore të Librit dhe të Drejtës së Autorit, Biblioteka Kombëtare e Shqipërisë iu bashkua edhe aktiviteteve të shumta kulturore të organizuara nga Fakulteti i Historisë dhe i Filologjisë, Universiteti i Tiranës, ku u promovuan disa nga botimet më të fundit studimore e letrare, u zhvilluan tryeza të rrumbullakëta, Festivali i Krijimit Letrar, interpretime të krijimtarive artistike nga Klubi i Dramës të studentëve të Departamentit të Letërsisë si dhe Panairi i Librit. Biblioteka Kombëtare promovoi botimin më të fundit “Lumo Skendo dhe themelimi i revistës Diturija – Aktet e Konferencës Shkencore zhvilluar në Tiranë e Prishtinë 2018 në kremtimet e 110-vjetorit të Kongresit të Manastirit & Bibliografi e revistës ‘Diturija’”.

Gjatë kësaj jave kushtuar lebrit, autorëve dhe leximit, rinisi udhën edhe Klubi i Leximit në Sallën Gjermane, tashmë i rikonceptuar si “Klubi i Letërsisë Gjermanofone”. Në ceremoninë e hapjes së këtij klubi ishin ftuar Ministrja e Kulturës, znj. Elva Margariti, Ambasadori i Republikës së Austrisë në Shqipëri, z. Johann Sattler, drejtoresha e Bibliotekës Kombëtare, Prof. Dr. Persida Asllani, si dhe përkthyes, botues, studentë, etj. Nën moderimin e botuesit Jorgji Qirjako, kjo ditë iu kushtua autorit austriak Robert Seethaler dhe romanit të tij “Një jetë e tërë”, sjellë mjeshtërisht në shqip nga Irena Nasi dhe botuar nga Tirana Times.

Veprimtaritë kulturore, të konceptuara si ditë për të promovuar kulturën e leximit,vijuan gjatë gjithë javës përmes vizitave të nxënësve të disa shkollave 9-vjeçare në Tiranë; grupeve të leximit të autorëve të letërsisë fëminore; vizitë në Laboratorin e restaurimin në BKSH, etj.