Ngjarje

“Klubi i leximit i letërsisë gjermanofone” sjell shkrimtaren Sandra Hoffmann

18 Maj 2019


 

“Klubi i leximit i letërsisë austriake” në Bibliotekën Kombëtare vijoi të shtunën pasdite, më 18 maj, me rrëfimin dhe përjetimet e shkrimtares bashkëkohore gjermane, Sandra Hoffmann, mbi romanin e saj autobiografik “Paula”, sjellë në shqip mjeshtërisht nga përkthyesi Sokol Mici dhe botimet Poeteka. Në këtë takim të veçantë me shkrimtaren morën pjesë studiues, përkthyes, studentë të gjuhës gjermane, tashmë ndjekës të rregullt të këtij klubi leximi.

I konceptuar në formën e një bashkëbisedimi të sinqertë me studiuesin dhe poetin Arjan Leka, dhe të pranishmit shkrimtarja gjermane, Sandra Hoffmann rrëfeu “marrëdhënien e saj me gjyshen e saj, me të fshehtën që ajo ruante”. Me guxim dhe butësi, Sandra Hoffmann tregon historinë e gjyshes së saj Paula, duke i kundërvënë pushtetit të heshtjes fuqinë e fjalës, përmes një ndërthurjes së realitetit dhe fictionit. Poeti Arjan Leka, gjatë prezantimit të shkrimtares gjermane dhe romanit të saj, duke e cilësuar Paulën si ‘njeriu që hesht’ u shpreh se “zgjodha ta shoh në këtë këndvështrim këtë libër pasi ne i japim shumë rëndësi fakti kur njerëzit flasin për herë të parë, por në këtë roman kemi të kundërtën. Kur njeri zgjedh të heshtë, edhe kur ka shumë për të treguar. Kjo heshtje është ajo që të tërheq, një rrugë e vështirë për t’u marrë”. Ndërsa vetë shkrimtarja duke kujtuar fëmijërinë e saj, marrëdhënien me gjyshen dhe gjithë procesin e krijimit të romanit “Paula” u shpreh se “përmes këtij romani jam munduar ta njoh më mirë gjyshen, duke u munduar të kuptoj kodet e heshtjes së saj, me gjithë shumëllojshmërinë e saj, me anë të ndryshme përmes të cilës ne mund ta shohim atë. Duke u përpjekur të jem sa më reale, pa tentuar të gjej ndihmë te trilli, që nuk do të më shërbente aspak në zbulimin e të vërtetave që gjyshja ime ruante dhe që i mori me vete”.

Shkrimtarja gjermane njihet nga publiku shqiptar edhe nga udhëtimi i saj me autobus një vit më parë nëpër Shqipëri, përshkrimin e të cilit ajo e ka botuar pak kohë më parë në shtypin gjerman. Sandra Hoffmann (1967) studioi për Letërsi, Studime Mesjetare dhe Studime Italiane në Universitetin e Tübingen-it, ku mbrojti masterin. Prej vitit 1998 deri në vitin 2002 ajo ka qenë asistente e hulumtimit shkencor pranë Katedrës për Letërsi Krahasuese në Tübingen dhe jep mësim lëndën “shkrim krijues”. Që prej vitit 2003 ajo jeton si shkrimtare në profesion të lirë. Në vitin 2004 ajo mori pjesë në konkursin letrar Ingeborg Bachmann në Klagenfurt. Prej vitit 2010 është pedagoge në Qendrën për Studime të Aplikuara Kulturore dhe Studime të Përgjithshme pranë Institutit të Teknologjisë në Karlsruhe. Për romanin e saj "Çfarë do t‘i mungojë atij kur të vdesë" (2012) ajo mori çmimin Thaddäus-Troll, ndërsa romani “Paula” është vlerësuar në vitin 2018 me Çmimin “Hans Fallada” të qytetit të Neumünster-it. Klubi i Leximit i Letërsisë Gjermanofone është një projekt i përbashkët i Bibliotekës Kombëtare, Ambasadës Gjermane, Ambasadës Austriake, Universitetit të Tiranës dhe Goethe-Zentrum.