Ngjarje

Përurim rikonstruksioni në Bibliotekën Kombëtare

 

 

Më 11 maj 2009, në përfundim të konkretizimit të Marrëveshjes së bashkëpunimit nënshkruar këtë fillimviti ndërmjet Drejtorit të Bibliotekës Kombëtare z. Aurel Plasari dhe Drejtorit Ekzekutiv të AMC-së z. Stefanos Oktapodas, u përurua rikonstruksioni i Sallës së periodikut shqip e të huaj.

Në ceremoninë përuruese të mjediseve të rikonstruktuara ishin të pranishëm autoritete të Ministrisë së Turizmit, Kulturës, Rinisë dhe Sporteve, personalitete të kulturës, punonjës të bibliotekave, përfaqësues të medias së shkruar dhe elektronike etj.

Z. Aurel Plasari falënderoi AMC-në për ndihmesën e dhënë për rikonstruksionin e plotë të kësaj salle leximi dhe vlerësoi dëshirën dhe nismën e kësaj kompanie për të mbështetur një institucion të tillë të rëndësishëm kulturor si Biblioteka Kombëtare.

Në emër të kompanisë që drejton, z. Oktapodas shprehu kënaqësinë që, në kuadër të përgjegjshmërisë sociale të AMC-së, kësaj here mbështetja u fokusua te Biblioteka Kombëtare. “Ky është një rast i veçantë, u shpreh ai, pasi kontributi për bibliotekën është shumë i rëndësishëm për qytetërimin. Ne jemi një kompani gjermano-greke dhe së bashku me stafin tonë vendas si dhe drejtuesit e nderuar të kësaj biblioteke kontribuojmë për kulturën shqiptare dhe besoj se ky është konkretisht edhe globalizmi për të cilin flasim e dëgjojmë çdo ditë”.

Projekti, që kishte filluar të zbatohej prej disa muajsh, finalizohet tanimë me mjedise komode, shërbime bibliotekare bashkëkohore sa më pranë standardeve europiane, si dhe përmirësime të ndjeshme të kushteve të shërbimit për përdoruesit. Fondi i lëvruar nga AMC-ja ka mundësuar riorganizimin e shërbimit të përdoruesve duke krijuar kushte mjaft të mira leximi dhe sidomos duke ofruar njё gamё më tё gjerё informacioni.

Salla e rinovuar e periodikut shqip e të huaj është organizuar sipas modelit të bibliotekave me “akces të lirë”. Materialet bibliotekare, si: revista, gazeta, botime periodike, anuarë, vjetarë statistikorë, katalogë etj. do të ofrohen tanimë në mjedise me fonde tё hapura. Krahas koleksioneve të revistave dhe gazetave korrente, lexuesit i shërbehen tanimë edhe materiale referative, si: fjalorë, enciklopedi, bibliografi etj., të organizuara simbas gjuhëve dhe fushave përkatëse.

Në ndihmë të lexuesve është riorganizuar edhe shërbimi i informacionit, i cili mundëson një orien¬im më të mirë të tyre në të gjithë aparatin informativ, si: skedarë manualë dhe elektronikë, botime bibliografike, Internet, katalog elektronik etj.

Duke synuar përmirësimin e shërbimit të përdoruesve dhe plotësimin e kërkesave gjithnjë në rritje të tyre, është krijuar këndi i shfrytëzimit të katalogut elektronik, ku janë shtuar poste pune.

Mjediset e rikonstruktuara janë pajisur me mjete dhe teknologji moderne të informacionit.