Ngjarje

Mesazh falenderimi për Bibliotekën Kombëtare

11 korrik 2019


 

Të nderuara punonjëse e punonjës të Bibliotekës Kombëtare,

ndonëse jam e vetëdijshme se rrugëtimi ynë i përbashkët profesional e njerëzor nuk do të ndalet me të vërtetë këtu, e ndjej të domosdoshme t’ju drejtohem me këtë mesazh mirënjohjeje në emër të vlerësimit që kam ushqyer për Ju që në ditën e parë të detyrës sime si drejtuese e Bibliotekës Kombëtare të Shqipërisë – këtij Kryemonumenti kulture, dijeje dhe kujtese – e deri në ditën e fundit, ku mbas pesë vitesh bashkëpunimi po i rikthehem me kohë të plotë jetës akademike me të cilën më lidhin rreth 25 vjet punë e përkushtim i pandërprerë.

Së bashku ndërmorëm sprova të shumta e sfiduese në respekt të misionit fisnik të këtij Institucioni, rritëm kapacitetet e tij komunikuese dhe thelluam rolin prej nxitësi e katalizatori kulturor e shkencor që e bën atë kaq unik e të çmuar në jetën e kombit. Krahas punës sa të rëndësishme. aq dhe të padukshme së jashtmi që Ju të nderuara kolege e të nderuar kolegë ndërmerrni me përkushtimin dhe pasionin tuaj çdo ditë, pjesë e së përditshmes së Bibliotekës Kombëtare u bënë shumë projekte dhe veprimtari që e drejtuan fokusin edhe më tepër të lexuesi, të grupmoshat e mitura e të reja, te aftësimi në informacion, te burimet digjitale, te shkëmbimi profesional, te shija e mirë e leximit dhe kërshëria e bukur e kërkimit. Shkolla Kombëtare e Bibliotekonomisë u zhvillua drejt një kurrikule të strukturuar në format të përafruar me atë universitar, duke katërfishuar të diplomuarit e rinj në shërbim të Rrjetit Kombëtar të Bibliotekave në vend. Konferencat shkencore, forumet, ekspozitat erudite, takimet me personalitete të ftuara nga vendi, rajoni e bota, klubet e leximit, Seminari antropologjik, Seminari Lakanian, botimet e shumta anastatike si dhe kolona botimi të themeluara prej nesh, përbëjnë një krenari të ligjshme prej rreth 260 veprimtarish të suksesshme, të frekuentuara prej mijëra pjesëmarrësish, përdoruesish e vizitorësh, të cilat e pasuruan edhe më tej jetën kulturore, shkencore e profesionale të Bibliotekën Kombëtare në pragun e 100-vjetorit të saj. Ajo do të ketë shumë shpejt, falë një bashkëpunimi shembullor me AKSHI-n dhe ekspertizës suaj të rrallë, një informatizim të plotë, një data-bazë të ri e bashkëkohor, një Bibliotekë Digjitale 100 fish më të pasur dhe një faqe të re ueb-i, të hijshme, miqësore e të dobishme për të gjitha nivelet e përdoruesve të saj të shumtë.

Më lejoni që edhe në emrin tuaj të falenderoj bashkëpunëtorët tanë të shumtë dhe në mënyrë të veçantë Këshillin Shkencor të Bibliotekës Kombëtare, përkujdesës i çmuar i jetës së institucionit, si dhe gazetarët e kulturës e Mediat në përgjithësi, me të cilat ndërtuam një partneritet të rëndësishëm e të domosdoshëm reciprokisht. Spikasin bashkëpunimet e shkëlqyera me Bibliotekën Kombëtare të Kosovës, me Departamentet e Letërsisë, të Gazetarisë, të Gjuhës e Kulturës Frënge, të Italianistikës, të Gjermanistikës, të Rusishtes etj, me Aleancën Franceze të Tiranës, me Institutin e Antropologjisë Kulturore, me Institutin “Musine Kokalari”, me Institutin e Studimeve Historike “Lumo Skëndo”, me Institutin Shqiptar të Studimeve Protestante, me Institutin Italian të Kulturës, atë të Studimeve Lakaniane, Instituti për Demokraci, media dhe Kulturë, ambasadat e SHBA-së, së Francës, Italisë, Austrisë dhe Rusisë, me Fondacionin Alsar, me Shoqatën e Gjuhësisë dhe me botues të shumtë, aktorë të rëndësishëm të jetës së librit shqip kudo në botë. Konferencat shkencore kombëtare kushtuar Jeronim De Radës, Musine Kokalarit, Anton Pashkut, Ibrahim Rugovës, Ndre Mjedjes, Ismail Kadaresë, Mid’hat Frashërit si dhe ekspozitat e forumet kushtuar Konicës, Nolit, Koliqit, Kokonës, Agollit, Vaigandit, Dantes, Ekos, Prustit, Apolinerit, Kamysë, Melvilit, Zvajgut, Rilkes etj., përforcuan rolin prej lideri kulturor e shkencor që ky Institucion dhe partnerët e tij të nderuar ndërmarrin me sukses në jetën kulturore e shkencore të vendit.

Nuk kam asnjë dyshim se mirënjohjes sime ndaj jush, të dashura kolege e kolegë, i bashkohen sot mijëra zemra që rrahën së bashku në momentet tona më të vështira. Do të mbetet e pashlyeshme në kujtesën time përkujdesja juaj ndaj librave të rrezikuar apo të dëmtuar, shpesh edhe në dëm të shëndetit, sikundërse do të jetë gjithmonë e vështirë t’ua tregojmë të tjerëve lëndimin tonë shpirtëror në rrethana të tilla. Pa sakrificën e skajshme njerëzore, pa profesionalizmin e lartë që ju karakterizon, pa vetëdijen e rrallë për këtë mision të jetës suaj, Biblioteka Kombëtare nuk do të kishte mbijetuar dhe nuk do të kishte rimëkëmbur vetveten pas incidenteve të zjarrit dhe të ujit ku u gjend për shkak të krizës së trashëguar 50 vjeçare të hapësirave të veta. Sot, pavarësisht mbështetjes së vijueshme prej Institucioneve shtetërore, si Ministria e Kulturës, Instituti i Ndërtimit dhe Këshilli i Ministrave, ajo mbetet ende në pritje të një zgjidhjeje përfundimtare e dinjitoze. Kjo zgjidhje, sikundërse është komunikuar disa herë edhe në publik, tashmë ngjan se po troket në pragun e saj. Shpresoj të jem krah jush ditën e përurimit të Bibliotekës së re Kombëtare. Do të jetë një nga ditët më të bukura të jetës sime!

Me respekt,

Prof. Dr. Persida Asllani