Ngjarje

Biblioteka Kombëtare, pjesë e aktiviteteve në muajin e leximit “Tetori i librit”

3 tetor 2019


 

Biblioteka Kombëtare e Shqipërisë, iu bashkua nismës me moton “Lexo shqip” e ndërmarrë nga Ministria e Kulturës në kuadër të aktiviteteve të shumta kulturore që do të zhvillohen përgjatë këtij muaji, i shpallur edhe si “Tetori i librit”. Përmes një takimi të veçantë me personalitete të kulturës, shkrimtarë, botues, studiues, përkthyes, gazetarë, etj., Ministrja e Kulturës, znj. Elva Margariti, çeli të mërkurën, më datë 3 tetor, fushatën e leximit “Dhuro, gjej, lexo”, e cila synon të nxisë drejt leximit brezin e ri.

Ministrja e Kulturës, znj. Elva Margariti, duke falënderuar drejtorin e Bibliotekës Kombëtare, z. Piro Misha, për bashkëpunimin midis institucioneve, u shpreh se “Biblioteka Kombëtare është pika e takimit ku flitet dhe diskutohet për librin. E rrethuar mes miqsh të mirë, ku ndërthuren brezat, zgjodhëm një agora publike për të hapur muajin e leximit, të cilin e kemi quajtur ‘Tetori i librit’, që i drejtohet të rinjve. Fokusi i këtij muaji është të flasim për librin dhe ta kthejmë atë në një mjet dialogu mes nesh”. Më tej ministrja Margariti theksoi se “kemi përpara një muaj të shkëlqyer të mbushur me aktivitete, lexime, dhurime, promovime, seminare, ekspozita, jo vetëm në Tiranë, por në gjithë Shqipërinë, madje edhe jashtë saj. Me moton “Lexo shqip!” gjatë kësaj fushate jemi përqendruar të flasim më shumë për librin shqip dhe të lexuarit shqip”.

Gjatë muajit tetor, në bashkëpunim edhe me institucione e kulturës apo edhe të arsimit, pritet të zhvillohen një sërë aktivitetesh të cilat do të përfshijnë promovime botimesh të reja, takime letrare, dhurime librash, konferencash shkencore, festivale letrare, etj. Nisma “Dhuro, gjej, lexo”, një ide e thjeshtë dhe sfiduese, konsiston në lënien e një libri të dashur në një ambient publik, në stol, urban, stacion, kafene etj., në të cilin mund të shkruani një shënim për këdo që e gjen. Kjo nismë do të zhvillohet përmes një sfide në rrjetet sociale, ku secili që lë librin e tij të preferuar diku, bën një foto ose video dhe e poston në faqen e tij të rrjetit social.