Ngjarje

Seminar mbi psikanalizën frojdiane në Bibliotekën Kombëtare

4 tetor 2019


 

Në Sallën Franceze të Leximit në Bibliotekën Kombëtare, në bashkëpunim me Rrethin Lakanian Shqiptar, ditën e premte, më datë 4 Tetor, u zhvillua seminari mbi psikanalizën frojdiane me temë “Fëmija i ndërlidhur” , me pjesëmarrjen e veçantë të dr. DanielRoy, psikanalist në Bordeaux dhe anëtar i Shoqatës Botërore të Psikanalistëve, si dhepsikanalistë, psikologë, studentë, etj. Gjatë këtij seminari, dr. Roy u ndal në “raportin që po krijojnë fëmijët dhe adoleshentët e këtij shekulli me pajisjet elektronike”, duke nxitur një temë diskutimi sa të prehtë aq edhe të ndjeshme si për prindërit dhe edukatorët ashtu edhe për psikologët.

Dr. Roy theksoi se “sot prindërit dhe edukatorët shqetësohen kur shohin fëmijët që ‘ndërlidhen’ gjithmonë e më herët, dhe gjithmonë e më gjatë me pajisjet elektronike që vihen në qarkullim masivisht nëpërmjet teknologjisë në botën njerëzore të përbashkët. Ekspertët debatojnë, ngrenë zërin, alarmohen” duke ngritur për diskutim pikëpyetje thelbësore se “a është kjo e dëmshme? Sa: pak, shumë, aspak?”. Ai shtoi më tej se “është shumë e rëndësishme të shohim se si fëmijët dhe adoleshentët arrijnë t’ia dalin mbanë falë burimeve të tyre të brendshme dhe duke nxjerrë në pah nganjëherë preferencat dhe nismat e tyre. Që në moshën foshnjore, 2-3 vjeçare, fëmijët tërhiqen nga ajo çka përbën qytetërimin tonë, pajisjet elektronike, të cilat kanënjë fuqi të jashtëzakonshme tërheqjeje. Kjo është ndërlidhja e tyre me botën tonë, me qytetërimin e këtij shekulli”.

Seminaret mbi psikanalizën frojdiane, një bashkëpunim i Bibliotekës Kombëtare dhe Rrethit Lakanian Shqiptar, janë shndërruar në një traditë suksesshme në këtë fushë duke sjellë në Shqipëri emrat më të njohur të psikanalizës evropiane si MyriamMitelman, GeertHoornaert, SergioCaretto, etj., si dhe përvojën e trajtimit profesional të pacientëve, një përvojë e vlefshme që mund të aplikohet edhe në Shqipëri. Psikanaliza, si praktikë e veçantë e lidhur ngushtësisht me fjalën dhe dëgjimin, po përpiqet tashmë prej vitesh të takojë mendimin shqiptar duke sfiduar mbetjet e ngërçet e një mendimi dhe një gjuhe të drunjtë post-totalitare.Jacques Lacan është një nga mendjet më sfidante të shekullit XX, që me analizat dhe parashtrimet e veta emancipoi profesionalisht breza të tërë psikanalistësh e intelektualësh në mbarë botën.