Ngjarje

Konferencë e studiuesit Bernd J. Fischer në Bibliotekën Kombëtare

 

 

I ftuar nga Qendra e Studimeve Albanologjike dhe i mirëpritur nga Biblioteka Kombëtare, studiuesi amerikan Bernd J. Fischer, profesor i historisë në Universitetin Indiana në SHBA, ka mbajtur më 16 maj 2009 në Sallën Amerikane konferencën "Synimet e Gjermanisë naziste në Shqipëri, 1943-1944". Merrnin pjesë albanologë, studiues dhe personalitete të fushave të ndryshme, drejtues dhe punonjës të Bibliotekës Kombëtare, lexues, gazetarë të mediave të ndryshme etj.

B. J. Fischer njihet në Shqipëri kryesisht përmes botimeve “Mbreti Zog dhe përpjekja për stabilitet në Shqipëri” (1996), “Shqipëria gjatë luftës, 1939-1945” (2000) dhe “Diktatorët e Ballkanit” (2008). Për të nuk është hera e parë që gjendet në mjediset e Bibliotekës Kombëtare; para disa vitesh, më 1999, ai ka mbajtur këtu ligjëratën “Monarkia në Shqipëri nga Zogu te Leka”.

Pas veprës "Shqipëria gjatë Luftës 1939-1945", autori Bernd J. Fischer ka vijuar kërkimet dhe hulumtimet në arkivat gjermane dhe britanike dhe ka shfrytëzuar dokumente të reja për politikat që nazistët ndoqën në Shqipëri. Gjatë konferencës ai analizoi synimet dhe politikën e Gjermanisë, raportet dhe marrëveshjet me qeveritë shqiptare të kohës dhe forca të tjera politike të përfshira në luftë, objektivat në fushën ekonomike dhe financiare etj.

Si ekspert i çështjeve historike dhe politike për Europën Juglindore, B. J. Fischeri, mbështetur në një dokumentacion të pasur, e ka parë në një dritë të re pushtimin gjerman dhe politikat e veçanta gjermane të ndjekura në Shqipëri, qëndresën ndaj tij, rolin e grupimeve të ndryshme politike të kohës etj.

Pas ligjëratës, shoqëruar nga Beqir Meta, drejtor i Institutit të Historisë, B. J. Fischeri iu përgjigj pyetjeve të të pranishmëve që kishin të bënin me strategjinë dhe politikat gjermane të kësaj periudhe lidhur me Shqipërinë, pozicionimin e forcave të ndryshme politike shqiptare ndaj tyre etj.