Ngjarje

Bibliotekarë nga Presheva vizitojnë Bibliotekën Kombëtare të Shqipërisë

15 nëntor 2019


 

Bibliotekarë nga Biblioteka Publike “Mehmet Jusufi” në Preshevë vizituan të enjten, më datë 15 nëntor, Bibliotekën Kombëtare të Shqipërisë. Gjatë kësaj vizite bibliotekarët nga Presheva shfaqën interes të veçantë të njihnin historikun e krijimit të Bibliotekës Kombëtare të Shqipërisë dhe veprat më të çmuara e trashëgiminë kulturore të shkruar që ruhet në arkivin e saj. Vëmendjen e tyre e tërhoqi historia e shkrimit dhe botimeve shqipe, identitetit dhe kulturës së kombit shqiptar, prej Mesharit të Buzukut (1555), riprodhuar nga At Justin Rrota, deri në botimet më të fundit dalë nga shtëpitë botuese pak ditë më parë. Po kaq interes ata treguan edhe për format e reja të komunikimit me publikun, kur zhvillimi marramendës i teknologjisë të mundëson aksesin e shpejtë në informacion përmes Bibliotekës Digjitale, e-Albanica, Katalogëve online, e-bibliografive si dhe për përfshirjen e BKSH-së në dy komunitetet më të mëdha virtuale të bibliotekave, “Europeana” dhe “World Digital Library” (“Biblioteka Digjitale Botërore). Në interesin e tyre ishin edhe programet që zhvillohen në Bibliotekën Kombëtare për nxitjen e leximit dhe afrimin e të rinjve me librin, duke u njohur kështu me programet “Edukimi përmes kulturës”, “Aftësimi në Media dhe Informacion”, Klubet e leximit, etj.