Ngjarje

BKSh, pjesë e aktiviteteve në Ditën Botërore të Filozofisë

16 nëntor 2019


 

Biblioteka Kombëtare e Shqipërisë mori pjesë të shtunën, më datë 16 nëntor, në Konferencën Shkencore Ndërkombëtare me temë: “Elitat me mendim dhe platforma idesh, jetamendonjëse dhe debati për projektimin e shqiptarit dhe Shqipërisë në prosperitet. Mendimtarët shqiptarë të viteve ‘20-’30 të shekullit të XX”, organizuar nga Departamenti i Filozofisë dhe i Shkencave Politike, Fakulteti i Shkencave Sociale (UT), në Ditën Botërore të Filozofisë të shpallur nga UNESCO. Ekspozita “ Mendimi elitar në botimet dhe shtypin shqiptar të viteve ’20-‘30” nga fondi arkivor i BKSh-së, risolli në vëmendje kontributin e jashtëzakonshëm të personaliteteve si Mid’hat Frashëri, Branko Merxhani, Vangjel Koça, Faik Konica, Kris Maloki, Anton Harapi, Nebil Çika, etj.

Përmes kumtesave shkencore të kësaj konference u rrokën tema të rëndësishme si elitat e viteve ’20-’30, çështje të neoshqiptarizmës, gjykatat shqiptare në këto vite, roli i figurave të shquara kombëtare si Anton Harapi, Mid’hat Frashëri, Faik Konica, Kris Maloki, Tajar Zavalani, Fan Noli, Branko Merxhani, Xhuzepe Valentini, Teki Selenicës, etj. Një kontribut i vyer në këtë konference ishte edhe analiza shkencore mbi botimet dhe periodikun shqiptar të kohës sjellë përmes kumtesës së Dr. Etleva Domi, nëndrejtore e Bibliotekës Kombëtare, me temë “ Mendimtarët shqiptarë të viteve ’20 - ’30-të të shekullit XX në këndvështrimin e një bibliografi”.