Ngjarje

Biblioteka Kombëtare përkujton 120-vjetorin e lindjes së Lasgush Poradecit

17 dhjetor 2019


 

Biblioteka Kombëtare e Shqipërisë, në 120-vjetorin e lindjes së një prej figurave më të shquara të letërsisë shqipe, Lasgush Poradeci, çeli ekspozitën “Lasgush Poradeci (1899-1987)”, duke sjellë në vëmendje të publikut dashamirës të gjithë krijimtarinë e tij të jashtëzakonshme, prej botimeve të para në shtypin shqiptar të kohës deri në botimet më të fundit të veprave të tij. Krahas veprës poetike qëndrojnë edhe shqipërime e tij mjeshtërore të lirikëve më në zë të letërsisë botërore si Aleksandr S. Puskin, Robert Burns, Bertolt Brecht, Hajnrih Hajne,Johann Wolfgang von Goethe, Vladimir V. Maâkovskij,Nina Makaroçkina, Victor Hygo, Adam Mickiewicz, etj. Në fondet e Bibliotekës Kombëtare ruhen me shumë kujdes edhe rreth 40 botime studimore mbi krijimtarinë dhe këtë fugurë të shquar të letërsisë dhe kulturës kombëtare.

Lasgush Poradeci (1899-1987), poet lirik dhe përkthyes, është pseudonimi letrar i Llazar Gushos. Mësimet e para i mori në vendlindje, në shkollën greke dhe atë shqipe, për t’i vazhduar në një shkollë rumune të Manastirit. Shkollimin e mesëm e kreu në një lice francez në Athinë. Më pas u vendos në Bukuresht kur nisi studimet e larta në disa fakultete, në fillim në degën e pikturës. Në vitin 1924 u vendos në Austri, ku nisi studimet e larta në Fakultetin e Filologjisë Romano-Gjermanike në Universitetin e Gracit, ku mbrojti edhe punimin me temë “Poezia e Emineskut dhe lidhjet e saj me poezinë popullore”. Në vitet ’20 -’30 botoi lirikat e tij në organet e ndryshme të shtypit të kohës, duke u bërë një nga zëra me të njohur e origjinalë të poezisë së re shqipe. Në vitin 1933, në kujdesin e veçantë tëdy personaliteteve të kulturës sonë kombëtare Asdrenit dhe Mitrush Kutelit, do të shihte dritën e botimin vëllimi “Vallja e yjeve”, që përfshinte poezi të shkruara e të botuara në vitet 1921-1924. Më 1937 u botua libri i dytë poetik, “Ylli i zemrës”. Me bindjen absolute të veçoritë e artit të tij e me kërkesa të larta, Lasgush Poradeci, duks synuar përsosmërinë, u bënte një përpunim të thellë krijimeve të tij poetike. Një pjesë e madhe e poezive të tij janë shkruar në dy ose më shumë variante.

Ekspozita do të qëndrojë e hapur për publikun në hollin e Bibliotekës Kombëtare të Shqipërisë.