Ngjarje

Ekspozitë në 100-vjetorin e Kongresit të Lushnjes

18 Janar 2020


 

Biblioteka Kombëtare e Shqipërisë, me rastin e 100-vjetorit të Kongresit të Lushnjes (1920-2020), përmes një ekspozite me koleksione nga fondi i arkivës, risjell në vëmendje të publikut këtë ngjarje të rëndësishme të historisë së Shqipërisë. Koleksionet e rralla si gazeta “Albania”, “Fletorja Zyrtare”, por edhe botime, albume dhe studime si “Këshilli Kombëtar 1920” me autor Kaliopi Naska; “Kongresi Kombëtar i Lushnjës” i Engjëll Zerdelias; “Kongresi i Lushnjes (21 janar – 31 janar 1920); “Qeveria e Kongresit të Lushnjes dhe veprimtaria e saj”, “Kongresi i Lushnjes dhe lufta e Vlorës”, Qarkoret e Ministrisë së Punëve të Mbrendshme, etj., vijnë për publikun si dokumente të rëndësishme historike.

Kongresi i Lushnjes ishte një kongres kombëtar me rëndësi të veçantë pasi mori vendime për rimëkëmbjen e shtetit shqiptar, për sigurimin e pavarësisë dhe mbrojtjen e tërësisë së tij territoriale. Ai u hap më 21 janar 1920, ndërsa punimet i zhvilloi prej 28 deri më 31 janar 1920. Në të morën pjesë mbi 50 përfaqësues nga të gjitha krahinat e përfshira më 1913 në kufijtë e shtetit shqiptar. Rrethanat historike të kombi shqiptar ishin shtysa themelore në mbajtjen e këtij kongresi kombëtar. Për thirrjen e tij u shprehën rrethet patriotike shqiptare që vlerësonin rrezikun e madh me të cilën po përballej vendi. Kongresi i Lushnjes miratoi një akt kushtetues, ku ripohohej sovraniteti i plotë i shtetit shqiptar, i shprehur nga organet e larta të zgjedhura prej tij. Kongresi zgjodhi Këshillin e Lartë prej 4 vetash, i cili do të kryente funksionet e kryetarit të shtetit si dhe një Këshill Kombëtar me 37 veta. Kryeministër i Qeverisë u zgjodh Sulejman Delvina.

Kjo ekspozitë, përmes periodikëve të kohës sjell atmosferën e atyre viteve të pasqyruar në faqet e shtypit shqiptar, përmes lajmeve dhe artikujve të shumtë që informonin mbi ecurinë e punimeve të Kongresit të Lushnjes, thirrjeve dhe vendimeve të rëndësishme që u morën.

Ekspozita do të qëndrojnë e hapur për publikun në Sallën Shkencore në Bibliotekën Kombëtare nga data 18 deri më 26 Janar.