Ngjarje

Shpallet fituesi i edicionit të tretë të çmimit të bibliofilisë “Lumo Skëndo”

 

 

Z. Ardian Turku, ministër i Turizmit, Kulturës, Rinisë dhe Sporteve, organizoi më 21 maj 2009 në mjediset e Bibliotekës Kombëtare shpalljen e fituesit të edicionit të tretë (2008) të çmimit kombëtar të bibliofilisë “Lumo Skëndo”.

Të pranishmit në këtë ceremoni-botues, publicistë, njerëz të letrave etj., u përshëndetën nga z. Aurel Plasari, drejtor i Bibliotekës Kombëtare, i cili nënvizoi rëndësinë e këtij çmimi në fushën e librit dhe të kulturës në tërësi. Pasi theksoi se ky vit shënon një rekord në botimet e Mithat Frashërit, ai ia dha fjalën prof. Luan Malltezit, i cili foli për vlerat e katër botimeve të këtij personaliteti të albanologjisë.

Duke marrë fjalën z. Ardian Turku theksoi se ky çmim i përvitshëm, i vetmi në llojin e tij, synon të nxisë standardet në editori, veçanërisht prirjet moderne dhe emancipuese në këtë fushë. “Libri- tha ai- mbetet padyshim një ndër prioritetet kryesore të Ministrisë së Turizmit, Kulturës, Rinisë dhe Sporteve, për rrjedhojë dikasteri që unë drejtoj ka qenë dhe mbetet i hapur të bashkëpunojë me ata faktorë të rëndësishëm në fushën e botimeve, të cilët kanë për qëllim të ndikojnë pozitivisht në gjenerimin e kulturës së shkruar si themel i kulturës së një kombi.”

Pastaj ai ia dha fjalën kryetarit të jurisë z. Aurel Plasari, i cili në emër të jurisë shpalli fitues të këtij çmimi në këtë edicion Botimet Çabej për realizimin e botimit “Sonete”, të autorit Eqrem Çabej me cilësi të spikatura estetike në transmetimin e vlerave të kulturës sonë të traditës.

Duke marrë në dorëzim certifikatën dhe trofeun e çmimit botuesja Brikena Çabej falënderoi jurinë dhe organizatorët e ceremonisë dhe uroi që në vitet e ardhshme të ketë botime gjithnjë më të denja për këtë çmim.