Ngjarje

Biblioteka Kombëtare, ekspozitë në përkujtim të Skënder Luarasit

21 janar 2020


Biblioteka Kombëtare e Shqipërisë, duke pasur gjithmonë në vëmendje promovimin e vlerave më të mira të trashëgimisë kulturore kombëtare dhe personaliteteve që i japin dinjitet asaj, çeli të hënën, më datë 20 janar, një ekspozitë përkujtimore në 120-vjetorin e lindjes së shqipëruesit, publicistit, studiuesit, arsimtarit Skënder Luarasi (1900-1982).

Në këtë ekspozitë u sollën në vëmendje të publikut krijimtaria e një nga personaliteteve të rëndësishme të kulturës shqiptare, nga artikujt e tij të parë botuar në periodikun e kohës si artikulli “E drejta dhe fuqia” botuar në gazetën “Dielli” në vitin 1919; për të vijuar më pas me të tjerë periodikë si “Rilindja e Arbënis”,”Zëri i Korçës”, ”Studenti”, “Dialëria”, etj., duke trajtuar tematika thelbësore tëçështjes shqiptare. Një vend të rëndësishëm në këtë ekspozitë zënë shqipërimetmjeshtërore tëemrave më të mëdhenj të letërsisë botërore si Friedrich von Schiller, Johann Wolfgang Goethe, William Shakespeare, George Gordon Byron, Charles Dickens, Walt Whitman, Aleksandr S. Puskin, Feliks Lope dela Vega, Henry W. Longfellow, John Milton, Kalidasa, etj. Përkthimet e para shohin dritën e botimit rreth viteve ’30. Përmes përkthimeve mjeshtërore Skënder Luarasi sjellë në gjuhën shqipe vepra si “Enoch Arden” të Alfred Tennyson, dramën indiane të Kalidasas përkthyer nga gjermanishtja titulluar “Sakuntala” apo dramën e famshme “Wilhelm Telli”, të cilat u botuan në vitet 1933-34.

Nuk mund të lihen jashtë vëmendjes veprat të cilat janë përmbledhur dhe përgatitur prej Skënder Luarasit si “Kolonel Thomson” (1934); “Vepra” e Migjenit (1957); “Petro Luarasi : jeta dhe vepra” (1958); “Gjerasim Qiriazi : jeta dhe vepra” (1962); “Fjala shqipe” (1961); “Isa Boletini : jetëshkrim i shkurtër” (1972); “Ismail Qemali” (1971) si dhe kujtimet nga Lufta në Spanjë me titull “Në Brigadat Internacionale në Spanjë” (1996).

Skënder Luarasi (1900-1982), i biri i Petro Nini Luarasit, është një nga figurat më të shquara të kulturës kombëtare. Mësimet e para i mori nga i ati, më pas ndoqi shkollën e mesme Robert Kolezh në Stamboll, e më tej në SHBA dhe në Austri. Në vitet 1926-1930 ndoqi studimet e larta në Fakultetin e Filozofisë në Universitetin e Vjenës. Punoi kryesisht në arsim, në Shkollën Teknike të Tiranës, në Shkollën Tregtare të Vlorës, në Gjimnazin e Tiranës dhe të Shkodrës. Më 1936 shkoi vullnetar në Spanjë, në Brigadat Ndërkombëtare, ku botoi gazetën “Vullnetari i Lirisë”. Në vitet 1939-1944 vuajti në kampet e përqendrimit në Francë dhe në vitin 1945 u kthye në atdhe. Skënder Luarasi ishte ndër anëtarët themelues të Lidhjes së Shkrimtarëve dhe Artistëve. Vijoi punën e tij në mësimdhënie në shkollat e mesme në Tiranë si dhe në Institutin e Shkencave. Me hapjen e dëgës së gjuhës dhe letërsisë angleze në Universitetin e Tiranës (1961) punoi si pedagog, më pas në Institutin e Gjuhësisë dhe të Letërsisë.

Ekspozita do të qëndrojë e hapur për publikun në hollin e Bibliotekës Kombëtare.