Ngjarje

Ekspozitën në 160-vjetorin e albanologut Gustav Weigand

17 shkurt 2020


 

Biblioteka Kombëtare e Shqipërisë çeli të hënën, më datë 17 shkurt, me rastin e 160-vjetorit të lindjes së albanologut gjerman Gustav Weigand, si një vëmendje të veçantë për kontributin e jashtëzakonshëm në studimet ballkanologjike. Kjo ekspozitë vjen për publikun edhe si një homazh ndaj gjestit sa shkencor aq edhe qytetar të Weigand-it, i cili, në vitin 1929, i dhuroi Bibliotekës Kombëtare të Shqipërisë 81 tituj të koleksionit personal albano-balkanologjik, vepra të madhore për kulturën dhe kombin shqiptar si : “Dottrina Christiana” Pjetër Budi (1664); “Katër Ungjillat” përkthyer prej greqishtes në shqip nga Kostandin Kristoforidhi (1886); “Dhiata e re” përkthyer prek Kostandin Kristoforidhit (1872); “Abavatar arbëror” i Anastas Kullurioti (1882); “Shkronjëtore e gjuhës shqip” prej Sami Frashërit (1886); “Rapsodie albanesi” prej Zef Skiroit (1887); “Abetare e gjuhës shqyp” prej Gaspër Benusi (1890); “Historia e Shcypniis” e Ndoc Nikaj (1902), etj., por edhe botime të tjera të vyera si “Elementi di grammatica della lingua albanese” të Giacomo Jungg (1881); “Skënderbeu ose heroi i shqipëtar” i Rogatien Faurrès (1912). Një vëmendje të veçantë në këtë ekspozitë iu kushtua kontributit të tij shkencor përmes studimeve të rëndësishme si : “Die Aromunen” (1895); “Die dialekte der Moldau und Dobrudscha” (1902); “Albanesische grammatik im Südgegische dialekt : (Durazzo, Elbasan, Tirana) : mit zwei Tafeln” (1913); “Albanesisch-deutsches und deutsch-albanesisches Wörterbuch” (1914); “Ethnographie von Makedonien : geschichtlich-nationaler, sprachlich-statistischer Teil” (1924); etj.

Gustav Weigand (1860-1930) është një nga personalitetet më të rëndësishëm shkencore të ballkanologjisë, kryesisht në fushën e hartimit të atlaseve gjuhësore, hulumtues i marrëdhënieve mes gjuhëve e kulturave të popujve ballkanikë, vështruar në kontekstet e tyre historike e etno-folklorike. Ai zuri një vend të rëndësishëm edhe në debatet shkencore mbi historinë e gjuhës shqipe, ku me interes të veçantë patën 12 argumentet e tij mbi prejardhjen e saj prej trakishtes. Ky studim u publikua pak vite para se ai të ndahej nga jeta, më 1927 në “Balkan Archiv”, dhe botua po atë vit në revistën “Diturija” nga Aleksandër Xhuvani.

Ekspozita do të qëndrojë e hapur për publikun në Sallën Albano-Ballkanologjike të Bibliotekës Kombëtare nga data 17 deri më 25 shkurt 2020.