Ngjarje

DITA BOTËRORE E LIBRIT NË BIBLIOTEKËN KOMBËTARE

 

 

Më 23 prill 2007, në mjediset e Bibliotekës Kombëtare në prani personalitetesh dhe miqsh të librit, të bibliotekave, të shkencës, të artit, përfaqësuesish të Trupit diplomatik etj. u përurua ekspozita “ Skënderbeu/ Për herë të parë për publi­kun/ Nga Koleksioni antikuar 1472-1830”, si ceremoni festimi për të gjashtin vit radhazi e Ditës Botërore të Librit. Nderuan me pjesëmarrjen e tyre Kryeministri i Shqipërisë, z. Sali Berisha, dhe Ministri i Turizmit, Kulturës, Rinisë dhe Sporteve, z. Ylli Pango.

Drejtori i Bibliotekës Kombëtare Aurel Plasari u uroi të pranishmëve mirëseardhjen dhe theksoi punën e kujdesshme dhe profesionale që bëhet në këtë institucion për ruajtjen e koleksioneve me vlera të rralla, posaçërisht atyre me karakter albanalogjik, konkretizim i të cilës është edhe ekspozita e përuruar. Në emër edhe të Këshillit Shkencor dhe të atij Administrativ ai falenderoi Kryeministrin për vëmendjen e treguar ndaj kësaj qendre të kulturës kombëtare.

Në përshëndetjen e tij z. Sali Berisha vlerësoi lart organizimin e kësaj ekspozite. Si përdorues i hershëm i Bibliotekës Kombëtare, Kryeministri vlerësoi në mënyrë të veçantë shërbimin e ofruar nga kjo bibliotekë nëpër kohë. Me këtë rast ai dhuroi tre libra antikuarë të bibliotekës vetjake: Jacques Lavardin, Histoire de Georges Castriot, svrnommé Scanderbeg… Franche-Ville 1604; Marinus Barletius, Historia del magnanimo, et valoroso signor Georgio Castrioto… Venetia 1568 dhe Camille Paganel, Szkanderbég Története… 1890.

Në përshëndetjen e tij z. Ylli Pango, Ministër i Turizmit, Kulturës, Rinisë dhe Sporteve, u ndal në përparësinë me të cilën do të trajtohen nga Ministria që ai drejton problemet e librit dhe të bibliotekave.

Festimi i Ditës së Librit i ka fillimet në Katalonjë të Spanjës, ku atyre që blinin një libër u dhurohej një lule: karafil ose trëndafil. Festa është ngulitur si “Botërore” në vitin 1995 prej UNESCO-s, ngaqë ajo shënon njëherësh datën e lindjes ose të vdekjes së disa shkrimtarëve klasikë, si Cervantes, Shakespeare, Laksnes, Druon etj. Thuajse të gjitha rajonet e botës janë përfshirë tanimë, me radhë, në këtë proces që e shndë­rron festimin e kësaj Dite në një veprimtari të për­hershme, për ta theksuar gjithnjë më fort rëndësinë e librit si gur themeli i kulturës botërore. Sot ajo festohet në më shumë se njëqind vende, prej miliona vetash të mbledhur rreth bibliotekave, shoqatave të botuesve, shkollave, organizmave publikë, grupimeve profesionale etj. Dita Botërore e Librit ka filluar të festohet në Shqipëri që prej vitit 2001 me nismën e Bibliotekës Kombëtare.

Përgjatë 12 vjetëve festimi i Ditës Botërore të Librit ka ndihmuar për të tër­he­qur rreth kauzës së librit një numër të madh njerëzish prej të gjitha kon­tinenteve dhe të gjitha horizonteve kulturore. Ajo u ka dhënë atyre mundësi të zbulojnë, të vlerësojnë dhe të thellojnë shumë anë të botës së mbrojtjes dhe promovimit të librit: libri si vektor vlerash dhe dijesh, por edhe si depozitues trashëgimie jomateriale; libri si dritare e hapur mbi ndryshmërinë e kulturave dhe si mjet dialogu; libri si burim të ardhurash materiale dhe vepër krijuesish mbrojtur nga e drej­ta e autorit etj. Prej vitit 2000 Dita Botërore e Librit ka dhënë shkas për lindjen e një tjetër nisme prej organizatave profesionale, që gëzon ndihmën e UNESCO-s dhe mbështetjen e shteteve: caktimin e Kryeqytetit Botëror të Librit. Zgjidhet kështu përvit një qytet që merr përsipër të vijojë, në­përmjet nismash të veta, veprimtaritë e vëna në lëvizje nga festimi i Ditës deri në vitin mbas­ar­dhës. Këtë vit është përzgjedhur si Kryeqyteti Botëror i Librit Bogotaja, Kolumbi.

Në ekspozitën që përurohet ditën e hënë, datë 23 prill 2007, në Bibliotekën Kombëtare do të paraqiten për herë të parë ( première) për publikun rreth 50 eksponate (botime të shekujve XV-XVIII, përfshirë edhe inkunabula) nga rreth 500 ekzem­pla­rë që për­m­ban në tërësi Fondi i Vlerave të Rralla. Fondi i Antikuarit i Bibliotekë s Kombëtare përbën një koleksion të posaçëm, shumë të rën­dë­si­shëm jo aq nga numri i vëllimeve, sa nga përmbajtja e tij. Është fjala për një fond që përfaqëson pasuri me vlera të mëdha për thesarin e kul­tu­rës kombëtare shqiptare e, si të tilla, të kulturës europiane.

Për këtë ekspozitë première janë përzgjedhur jetëshkruesit dhe autorët kryesorë të Gjergj Kastriotit, Skënderbeut, si dhe autorë përfaqësues veprash dra­matike e let­ra­re mbi të, ndër ta: Barletius, M.; Franco, D.; Blancus, F.; Biemmi, G.; P.; Sansovino, F.; Lavardin, J. de; Pontanus, G. B.; Du­­pon­cet, J,. ; Possenti, A.; Menense, L. de; Zannovitch,. S.; Thevet, A., Hil­de­brandt, J. A. Ch.; Sarrochi, M.; Chevreau, U.; Kockert, J.; Bussières, J. de; La Ro­che -Guilhem; Salvi, A.; Boissat, Th.; La Mothe, A. H. de; Zaniboni, A.; Velez de Gue­­va­rra, L.; Krug von Nilda, F., etj., të gjithë vlera të trashëgimisë europiane në Shqipëri.