Ngjarje

Workshop rajonal për probleme të ISBN-së

 

 

Si e para veprimtari rajonale për probleme të ISBN-së, workshopi i zhvilluar në mjediset e Bibliotekës Kombëtare më 8-9 qershor 2009 ngjalli interes te pjesëmarrësit. I organizuar nga Biblioteka Kombëtare e Shqipërisë dhe Agjencia Ndërkombëtare e ISBN-së, ky workshop trajtoi probleme teorike dhe praktike në fushën e standardizimit të të dhënave për librin në rrafsh global.

Në fjalën përshëndetëse, z. Aurel Plasari, drejtor i Bibliotekës Kombëtare, mirëseardhi miqtë nga vendet ballkanike dhe falënderoi z. Brian Green, drejtor ekzekutiv i Agjencisë Ndërkombëtare të ISBN-së, i pranishëm në workshop, për zgjedhjen e Shqipërisë si vend organizator të kësaj veprimtarie të rëndësishme

Duke falënderuar mikpritësit, z. Brian Green theksoi që jo më kot u zgjodh Shqipëria për organizimin e workshopit. “Ne do të diskutojmë, por edhe do t’u japim përgjigje këtu problemeve të ISBN-së që presin zgjidhje”,- tha ai.

Programi i dy ditëve të veprimtarisë përfshinte si probleme të përvojës pozitive ekzistuese, ashtu edhe diskutime për zhvillimet e ardhshme në këtë fushë, përfshirë zbatimin e ISBN-së në librat elektronikë dhe materiale të tjera digjitale.

Ky takim rajonal shërbeu si një mundësi trajnimi dhe diskutimi mes kolegësh nga agjencitë ballkanike të ISBN-së. Problemet që u trajtuan kishin të bënin me sistemin e ISBN-së dhe rolin e Agjencisë Ndërkombëtare në të, përgjegjësitë dhe funksionet e agjencive lokale të ISBN-së, lidhja me bazat e të dhënave si bibliografitë kombëtare, Books in Print etj. U theksua sidomos domosdoshmëria e kontaktit të vijueshëm me Agjencinë Ndërkombëtare të ISBN-së, me Drejtorinë e Botuesve pranë saj si edhe me website-in dhe software-in e kësaj agjencie.