Ngjarje

Mirënjohje për dr. Aurel Plasarin nga Biblioteka Kombëtare e Kosovës

 

 

Një ceremoni festive për shënimin e 65-vjetorit të themelimit të Bibliotekës Kombëtare dhe Universitare të Kosovës (BKUK), u organizua më 25 nëntor 2009 në Prishtinë, në prani të autoriteteve të larta të qeverisë së Kosovës, përfaqësuesve të trupit diplomatik, të botës akademike të Prishtinës etj. Me këtë rast Dr. Aurel Plasarit iu dorëzua Dëshmia e Mirënjohjes për kontributin e shquar në forcimin e lidhjeve ndërmjet BKUK dhe BKSh.

Dr. Plasari falenderoi BKUK për vlerësimin e lartë dhe shprehu kënaqësinë për bashkëpunimin dhe partneritetin mes këtyre dy institucioneve të rëndësishme të kulturës kombëtare. Të përfshira në rrjedhat integruese bashkëkohore të epokës digjitale, dy bibliotekat tona do të punojnë që në të ardhmen të rritin bashkëpunimin e tyre në nivele konkurruese, gjithnjë në të mirë të ruajtjes, shërbimit dhe pasurimit të vlerave të trashëgimisë së shkruar që ato bartin në koleksionet e tyre, përfundoi Plasari.

Viteve të fundit marrëdhëniet e bashkëpunimit midis BKUK dhe BKSH janë institucionalizuar përmes një vargu marrëveshjesh bashkëpunimi shumëplanëshe dhe dokumentesh themeluese me interes të ndërsjellë, të cilat kulmojnë me themelimin e Konferencës Kombëtare të Bibliotekonomisë më 2006. Ka njohur rritje sidomos shkëmbimi i mendimit të specializuar në funksion të përfshirjes së këtyre dy bibliotekave, por edhe të rrjetit të bibliotekave të Shqipërisë dhe të Kosovës, në proceset europiane dhe më gjerë të zhvillimeve bibliotekare.

Me këtë Dëshmi Mirënjohjeje u nderuan gjithashtu Ambasada e Shteteve të Bashkuara të Amerikës në Prishtinë dhe Ministria e Arsimit, Shkencës dhe e Teknologjisë e Republikës së Kosovës.