Ngjarje

Rreth 1000 libra donacion i Bibliotekës Kombëtare për zonën e përmbytur

 

 

Biblioteka Kombëtare organizoi një konferencë shtypi më 20 janar, në të cilën shpalli nismën për t’u dhuruar një kontigjent prej 1000 librash bibliotekave shkollore të zonave të përmbytura në rrethin e Shkodrës.

Dr. Aurel Plasari, drejtor i kësaj biblioteke, informoi mediat e pranishme për nismën si një gjetje të institucionit për t’iu ndodhur pranë banorëve të zonave të përmbytura tani që situata e emergjencës është kapërcyer. Ai falënderoi Ministrinë e Turizmit, Kulturës, Rinisë dhe Sporteve për mirëkuptimin dhe mbështetjen si edhe bibliotekën “Marin Barleti” të Shkodrës për gadishmërinë e menaxhimit të shpërndarjes së librave. “Ky informacion që po japim,- tha zoti Plasari,- nuk ka thjesht vlerën e publicitetit, por mbi të gjitha transmetimin e mesazhit njerëzor se ne u jemi pranë shpirtërisht banorëve të zonave që përjetuan një situatë aq të rëndë në jetën e tyre”.

Drejtori i Bibliotekës Kombëtare gjeti rastin të theksojë se flitet për një zonë tradicionalisht të dalluar për një rrjet funksional të bibliotekave shkollore, të cilat e meritojnë kujdesin dhe vëmendjen institucionale në këto momente të vështira. Ai premtoi vijimësi të ndihmës së gjithanshme për këto biblioteka, si në dhurim librash, ashtu edhe në aspektin metodik të përmirësimit të shërbimeve bibliotekare për nxënësit dhe komunitetin në përgjithësi.

Në emër të Bibliotekës Publike të Shkodrës foli drejtori i saj z. Gjovalin Çuni, i cili falënderoi Bibliotekën Kombëtare për nismë në ndihmë të bibliotekave shkollore të zonës së Shkodrës në situatën e krijuar. Pasi bëri një përshkrim të shkurtër të sistemit të bibliotekave në shkollat e qarkut, ai premtoi se, në bashkëpunim me Shtabin Qendror të përballimit të situatës së krijuar nga përmbytjet dhe me Drejtorinë Arsimore Rajonale, biblioteka e Shkodrës do të bëjë më të mirën si koordinatore dhe partnere e Bibliotekës Kombëtare në këtë nismë. Z. Çuni u bëri apel botuesve t’i bashkëngjiten kësaj nisme dhe të kontribuojnë edhe ata në dobi të pasurimit të koleksioneve të bibliotekave të shkollave.

Në emër të Ministrisë së Turizmit, Kulturës, Rinisë dhe Sporteve, zëvendësministrja Zana Turku vlerësoi lart nismën, e cila u përkrah menjëherë nga dikasteri duke besuar se njerëzit në zonat e dëmtuara, në veçanti nxënësit e shkollave, kanë nevojë edhe për mbështetje njerëzore si kjo e Bibliotekës Kombëtare. Ministria, tha ajo, është e angazhuar seriozisht që nëpërmjet institucioneve të kulturës të japë ndihmesën e vet në normalizimin e situatës. Ajo gjeti rastin të falënderojë edhe një herë Bibliotekën Kombëtare dhe bibliotekën e Shkodrës si partnere në realizimin e kësaj nisme.

Gazetarët e pranishëm, të medias së shkruar dhe asaj elektronike, shprehën interesimin e tyre dhe bënë pyetje lidhur me tematikën e librave të dhuruar, gjendjen e bibliotekave shkollore të zonave të përmbytura etj.