Ngjarje

Java e Bibliotekës në Kosovë

 

 

U mbajt edicioni i tetë i Javës së Bibliotekës në Kosovë (12-17 prill 2010). Në këtë ngjarje të përvitshme ishin ftuar edhe përfaqësues të Bibliotekës Kombëtare të Shqipërisë. Në ditën e dytë të veprimtarive, të zhvilluara në mjediset e Bibliotekës Kombëtare dhe Universitare të Kosovës, u prit me interes ligjërata Albania e Konicës për “ne” dhe “të tjerët”, mbajtur nga Dr. Aurel Plasari, drejtor i BKSh.

“Për revistën Albania të Faik Konicës,- tha Dr. Plasari,- është shkruar dhe rishkruar. Ajo është vlerësuar si monument i kulturës shqiptare. Teksti elektronik i prodhuar ka qenë një nga ambiciet e para të fillimit të këtij procesi të ndërmarrë nga departamenti i informatikës dhe teknologjive të reja në institucionin tonë”. Tanimë prodhimi në suport elektronik i revistës Albania ofron mundësinë e një rivlerësimi të saj: për “ne”, d.m.th. për specialistët e bibliotekave dhe për “të tjerët”, d.m.th. përdoruesit.

"Albania" është revista e parë që pa dritën e botimit jashtë Shqipërisë. Ajo nisi botimin në nëntor të vitit 1896, për të dalë disa muaj më vonë në vitin 1897. Botimi i saj vijoi deri në vitin 1902, kohë kur Konica u vendos në Londër, e me pas deri më 1907. Pushoi një vit, për t'u kthyer sërish, por vetëm me një numër. Edhe pse me një histori luhatjesh dhe hapje-mbylljesh kjo revistë u bë një faktor i rëndësishëm në kohën e vet dhe mblodhi rreth saj pena si Luigj Gurakuqi, At Shtjefën Gjeçovi, Gjergj Fishta, Ndre Mjedja, Ndoc Nikaj etj. Në faqet e saj zuri vend më së shumti çështja e gjuhës shqipe, diskutimet për të cilën u kthyen në referendum për formimin e një gjuhe të njehsuar letrare. Gjithashtu dolën në dritë e burime të reja historike, dokumente që botoheshin për herë të parë në faqet e kësaj reviste.

Ligjëruesi kujtoi faktin se të interesuarit tashmë kanë mundësi ta gjejnë koleksionin e kësaj reviste kudo, duke shfrytëzuar internetin në shtëpi, shkollë, vende pune, kafe-internet etj., që prej numrit të parë deri në numrin e fundit. Sipas tij rubrika Albanica në faqen elektronike të BKSh është ndërtuar me tri shtylla kryesore: shtylla e parë do të ketë të bëjë me tekstet themelore të albanologjisë, shtylla e dytë do të përmbajë tekstet e vjetra të gjuhës shqipe, ndërsa shtylla e tretë ka ambicien të prodhojë në formë tekstesh elektronike disa nga periodikët më të rëndësishëm të kulturës shqiptare.

Me këtë rast z. Aurel Plasari i dhuroi drejtorit të BKUK-së z. Sali Bashota CD me variantin elektronik të kësaj reviste.

Po në këtë ditë referoi edhe znj. Etleva Domi, zëvendësdrejtore e Bibliotekës Kombëtare të Shqipërisë, e cila mbajti ligjëratën e titulluar “Koleksionet e veçanta të Bibliotekës Kombëtare të Shqipërisë”. Ajo e njohu auditorin me vlerat e rralla librore që gjenden në koleksionet tona si incunabul-a, kodikë, antikuarë, dorëshkrime etj. si dhe me punën që bëhet për shërbimin dhe konservimin e tyre.