Ngjarje

Memorandum bashkëpunimi për rivlerësimin e trashëgimisë së shkruar të shtetit shqiptar dhe në veçanti të parlamentarizmit

 

 

Nismëtare e festimit të 23 Prillit, Ditës Botërore të Librit, Biblioteka Kombëtare përzgjodhi për këtë vit një ngjarje të rëndësishme: nënshkrimin e Memorandumit të bashkëpunimit me Kuvendin e Shqipërisë. Veprimtaria u organizua në Sallën Enciklopedike “Lumo Skendo” të ndërtesës së vjetër (të rikonstruktuar) të Bibliotekës Kombëtare. Merrnin pjesë deputete të Parlamentit Shqiptar, zv/ministrja e Turizmit, Kulturës, Rinisë dhe Sporteve Zana Turku, anëtarë të këshillit shkencor dhe atij administrativ të Bibliotekës Kombëtare etj.

Pas leximit të tekstit të Memorandumit, drejtori i Bibliotekës Kombëtare Aurel Plasari përshëndeti të pranishmit në ceremoni. Ai falënderoi znj. Jozefina Topalli, kryetare e Kuvendit të Shqipërisë, për interesimin dhe vëmendjen e saj ndaj Bibliotekës Kombëtare duke shprehur kënaqësinë e veçantë për nënshkrimin e marrëveshjes së bashkëpunimit në këtë Ditë të Librit. “Tashmë mbi baza institucionale, ky bashkëpunim do të zgjerohet më tej përmes implementimit të shpejtë të Memorandumit që po nënshkruajmë,- tha z. Plasari.- Specialistët tanë po punojnë për evidentimin në koleksionet tona të botimeve mbi historinë e shtetit shqiptar dhe në veçanti të parlamentarizmit të munguara në bibliotekën e Kuvendit të Shqipërisë”. Duke vlerësuar interesimin e posaçëm të Kryetares së Kuvendit për mbarëvajtjen e Bibliotekës Kombëtare, z. Plasari tha se “nënshkrimi i marrëveshjes së bashkëpunimit, në këtë ditë feste për miqtë e librit, forcon edhe më tej, raportet e shkëlqyera midis Kuvendit dhe Bibliotekës”. Pasi foli për historikun e Ditës Botërore të Librit dhe për traditën e festimit të saj në Bibliotekën Kombëtare ai i dhuroi znj. Jozefina Topalli, ashtu si në gjithë botën veprohet në këtë ditë, një karafil të kuq dhe një libër. Libri i dhuruar, i quajtur “Libri i Artë” i Bibliotekave Kombëtare Europiane, përmban informacion për pasuritë librore të bibliotekave kombëtare të Europës dhe hapet me botimin madhor për Skënderbeun të Marin Barletit.

Duke marrë fjalën, znj. Jozefina Topalli falënderoi përzemërsisht drejtorin Plasari për këtë dhuratë me finesë dhe elegancë. Kryetarja e Kuvendit u shpreh se ndihet krenare që merr pjesë në një veprimtari krejtësisht të ndryshme nga të tjerat, me një simbolikë të veçantë për botën e librave. Duke përgëzuar punonjësit e Bibliotekës Kombëtare dhe veçanërisht drejtorin Aurel Plasari për punën e jashtëzakonshme që po kryejnë për librat dhe bibliotekën, ajo u shpreh: “Dua të përgëzoj të gjithë punonjësit e Bibliotekës Kombëtare, dhe në mënyrë të veçantë përgëzimet më të mëdha shkojnë për drejtorin Plasari, për punën e jashtëzakonshme që ka bërë dhe vazhdon të bëjë me një pasion të paparë, një pasion që e kanë vetëm njerëzit që i janë përkushtuar librit dhe bibliotekës. Këtë gjë ne e prekim dhe e ndiejmë në të gjitha sallat e këtij mjedisi të ri dhe të rikonstruktuar, me librat që kanë një vlerë të jashtëzakonshme. Unë kam parë punën që po bën stafi juaj, nën drejtimin e zotit Plasari, qoftë për digjitalizimin e botimeve, qoftë për mënyrën sesi i kanë ruajtur dhe po punojnë mbi librat e vjetër prej disa shekujsh, duke filluar nga Marin Barleti. Ndihem krenare për nënshkrimin e këtij memorandumi, të cilin ndoshta duhet ta kishim bërë më përpara, por që, gjithsesi, ai po nënshkruhet në një ditë shumë të veçantë. Unë besoj që bashkëpunimi midis Kuvendit të Shqipërisë dhe Bibliotekës Kombëtare do të jetë shumë më intensiv, i vërtetë dhe me vijimësi të pakufishme ”,- tha Kryetarja e Kuvendit.

Memorandumi i nënshkruar është një marrëveshje që synon shkëmbimin e ndërsjellë të botimeve, të informacionit dhe të njësive bibliotekare midis Kuvendit të Shqipërisë dhe Bibliotekës Kombëtare. Njëherësh, ajo parashikon edhe promovimin e trashëgimisë së shkruar kombëtare në rrjetet botërore të informacionit, digjitalizimin e botimeve të kësaj trashëgimie dhe mbështetjen e Kuvendit të Shqipërisë për veprimtari kulturore e shkencore të Bibliotekës Kombëtare.

Tekstin Memorandumit mund ta gjeni në zërin PËRSHKRIMI, rubrika Ligje, rregullore, dokumente të këtij website-i.