Ngjarje

Konferencë shtypi për 90-vjetorin e Bibliotekës Kombëtare

 

 

Ministri i Turizmit, Kulturës, Rinisë dhe Sporteve z. Ferdinand Xhaferraj dhe drejtori i Bibliotekës Kombëtare z. Aurel Plasari shënuan, në një konferencë për shtyp, ditën historike të 90 vjetëve prej themelimit të Bibliotekës Kombëtare dhe bënë të njohur paketën e veprimtarive që do të organizohen me rastin e këtij përvjetori. Konferenca u organizua më 10 korrik 2010 në mjediset e Bibliotekës së vjetër. Merrnin pjesë shkrimtarë, intelektualë, gazetarë, lexues dhe punonjës të saj.

Në fjalën e rastit z. Aurel Plasari kujtoi se kjo konferencë shtypi shënon 90-vjetorin e vendimit për themelimin e institucionit. Nga konsultimi i shtypit dhe dokumenteve të tjera,- vuri në dukje ai,- rezultoi saktësimi i datës: 10 korrik 1920, pra në muajt e parë të vendosjes së qeverisë shqiptare në Tiranën e saposhpallur kryeqytet. Në gjithë botën e qytetëruar,- vijoi ai,- datat e themelimit të bibliotekave nuk janë thjeshtë festa të punonjësve të tyre, por festa të lexuesve dhe përdoruesve të tyre. Personalisht e quaj nder të hap këtë konferencë shtypi dhe të shënoj këtë përkujtim historik. Me Këshillin Administrativ dhe atë Shkencor kemi vendosur që 90 ditët që vijnë pas të jenë ditë veprimtarish me ngjarje të ndryshme, midis të cilave konferenca shkencore, ekspozita të ndryshme, memorandume që do të nënshkruhen etj., të cilat do të kulmojnë me festën e celebrimit të këtij përvjetori. Në fund të fjalës së tij, ai gjeti rastin të falënderojë publikisht z. Ferdinand Xhaferraj për vëmendjen dhe kujdesin e veçantë ndaj Bibliotekës Kombëtare.

Duke marrë fjalën, z. Ferdinand Xhaferraj e quajti Bibliotekën Kombëtare institucion tempull, ku ruhen dhe promovohen vlera të shquara shpirtërore, historike dhe intelektuale. Pasi nënvizoi se Shqipëria është tashmë në paradhomën e Bashkimit Europian, ai tha se Biblioteka Kombëtare ka shkuar më tej: ajo është sot pjesë krejtësisht e sistemuar në rrjetin europian të bibliotekave, po kështu pjesë integrale e kulturës digjitale europiane dhe botërore. Këto dëshmojnë një konceptim dhe përqasje të re ndaj informacionit dhe janë një ndër arritjet më të mëdha të Shqipërisë demokratike.

Në fund ministri foli për probleme të ristrukturimit të institucionit, si edhe të zgjerimit të hapësirave për librin dhe lexuesit; po ashtu ai shprehu mirënjohje, respekt dhe vlerësim për z. Aurel Plasari, për punonjësit dhe ekspertët e Bibliotekës Kombëtare për përkushtimin, seriozitetin dhe përgjegjësinë e treguar për mbarëvajtjen e punëve në këtë institucion të rëndësishëm të kulturës kombëtare.