Ngjarje

Donacion dhe vizitë lamtumire e ambasadorit amerikan në Bibliotekën Kombëtare

 

 

Para largimit nga Shqipëria z. John L. Withers II, ambasador i Shteteve të Bashkuara të Amerikës në vendin tonë, bëri një vizitë lamtumire në Bibliotekën Kombëtare. Në mjedisin e American Corner ambasadori u prit nga ministri i Turizmit, Kulturës, Rinisë dhe Sporteve z. Ferdinand Xhaferraj dhe drejtori i Bibliotekës Kombëtare z. Aurel Plasari. Në takim merrnin pjesë drejtues të institucioneve të kulturës dhe të kujtesës, anëtarë të këshillit shkencor dhe specialistë të BKSh, punonjës të dikasterit të kulturës etj.

Në fjalën e mirëseardhjes z. Aurel Plasari vlerësoi vizitën e ambasadorit Withers, vizitë që përkon me përfundimin e mandatit të detyrës së tij të rëndësishme në Tiranë. Ai vlerësoi bashkëpunimin me ambasadën, ndihmën e saj dhe personalisht të zotit Withers për kontaktet dhe marrëdhëniet e ngushta dhe produktive me bibliotekat e shquara amerikane, si edhe me përvojën e shkencës amerikane të bibliotekonomisë, e cila qëndron në krye të zhvillimeve në këtë fushë të rëndësishme të dijes, kulturës dhe informacionit. Z. Plasari uroi që fryma e bashkëpunimit të frytshëm dhe e ndihmës së ambasadës amerikane të vijojë edhe në të ardhmen.

Duke marrë fjalën e përshëndetjes ambasadori Withers nënvizoi domethënien dhe rëndësinë e kësaj vizite të tij në Bibliotekën Kombëtare. Pasi falënderoi zz. Xhaferraj dhe Plasari për mikpritjen ai u ndal në rolin e rëndësishëm të librit dhe të bibliotekave në shoqëritë e hapura demokratike, në bashkëpunimin e suksesshëm me bibliotekat dhe në veçanti me BKSh. Ai paralajmëroi dhe vlerësoi sidomos konferencën shkencore për të rejat në fushën e bibliotekonomisë që do të mbahet së shpejti në Tiranë si veprimtari e përbashkët e Bibliotekës Kombëtare të Shqipërisë dhe Bibliotekës së Kongresit, Uashington

Z. Withers i dhuroi z. Plasari botimin luksoz të Enciklopedisë së historisë kulturore dhe intelektuale të Amerikës së toku me një numër të konsiderueshëm botimesh amerikane me vlerë si libra, revista dhe videokaseta me informacion të shumëllojshëm nga fusha të ndryshme si enciklopedi, letërsi, arte, shkencë etj., donacion i Ambasadës së ShBA në Shqipëri për BKSh. Nga ana e tij z. Plasari i dhuroi ambasadorit riprodhimin e një ilustrimi të gazetës “Dielli”, organ i shqiptarëve të Amerikës. Duke dorëzuar dhuratën ai tha në mënyrë kuptimplote: “Duke qenë se as shqipja, as anglishtja nuk kanë në fjalorin e tyre urimin e përkundërt të mirëseardhjes, po ju dhurojmë këtë riprodhim, dicitura e të cilit ka urimin që të dy gjuhët tona e kanë: Mirëseardhe!”. Z. Xhaferraj i dhuroi ambasadorit botimin cilësor Statutet dhe urdhëresat e kapitullit të Kishës Katedrale të Drishtit = Statuta et ordinationes capituli Ecclesiae Cathedralis Drivastiensis, botim i shtëpisë botuese Ombra GVG, që fitoi çmimin kombëtar të bibliofilisë “Lumo Skendo” për vitin 2009.

Të pranishmit shijuan shampanjën e koktejlit të bujarisë dhe bisedat e lira dhe të përzemërta me njëri-tjetrin dhe mikun e shquar amerikan.