Ngjarje

Promovimi i librit '' PRESIDENTI IBRAHIM RUGOVA '' i autorit Sabri Hamiti

 

Paraditen e 2 korrikut 2007, në sallën e madhe të Bibliotekës Kombëtare, Tiranë, u zhvillua ceremonia e promovimit të librit të Sabri Hamitit “Presidenti Ibrahim Rugova. Memento për Rugovën”, në bashkëpunim me shtëpinë botuese “55”, realizuese e këtij botimi. Mes historianësh, shkrimtarësh, studiuesish e miqsh të librit ishte i pranishëm vetë autori i librit, dr. Sabri Hamiti me zonjën e tij Kumrie Rugova-Hamiti. Ceremoninë e nderonin me pjesëmarrjen e tyre zv.ministrja e TKRS znj. Zana Turku, ish-ministri TKRS dhe anëtar i Kuvendit të Shqipërisë z. Bujar Leskaj, si dhe personalitete të tjera të kulturës e politikës.

Në Fjalën e hapjes drejtori i Bibliotekës Kombëtare dr. Aurel Plasari e përshkroi Ibrahim Rugovën “në shtëpinë e tij” në mjediset e Bibliotekës Kombëtare, në sallat e studimit të Albano-Balkanologjisë ku ai ka kryer hulumtimet e tij shkencore, në fondet e Bibliotekës ku ai ndodhet tanimë me veprat e tij tok me shkrimtarët e letërsisë shqipe, “djep i formimit të tij”, sikurse e ka cilësuar atë Hamiti në mementon e tij. “Si lum ai popull që ka liderë të tillë!”: me këtë formulë e përfundoi Plasari Fjalën e tij duke vlerësuar lakmueshëm modelin e një presidenti të ardhur nga nivelet më të larta të inteligjencies shqiptare të Kosovës, nga bota e letërsisë dhe e librave. Drejtori i shtëpisë botuese “55”, shkrimtari dhe publicisti Fahri Balliu, e cilësoi mementon e Hamitit për Rugovën “një akt të madh qytetar”. “Tre ikona të mëdha të jetës sonë: Skënderbeu, Nënë Tereza dhe Ismail Kadare janë përçorë të fatit të ndritur të shqiptarëve që i çon për nga rruga e Rugovës”, u shpreh ai. Duke analizuar Formulën Politike të Rugovës për fatin e Kosovës nga pikëpamja qytetërimore, ai e quajti atë “një program të madh rilindasi shenjtor për t’i orientuar të gjithë shqiptarët nga e mira”. Vetë autori Sabri Hamiti Hamiti e përshkroi veten të nderuar para auditorit: për faktin që ngjarja e botimit të librit mbi mikun dhe bashkëluftëtarin Ibrahim Rugova zhvillohej në mjediset e Bibliotekës Kombëtare, Tiranë, falë bashkëpunimit të kolegut dhe mikut të tij Aurel Plasari dhe botuesit Fahri Balliu, të cilin e dalloi për cilësitë e tij prej botuesi të spikatur.

Ceremonisë ia shtuan tonet emocionale dy miq të ftuar nga bota e artit teatror, aktorët Yllka Mujo dhe Mirush Kabashi, të cilët lexuan për auditorin pjesë të zgjedhura nga teksti i mementos së sapopromovuar.