Ngjarje

Konferencë rajonale e American Corner-ve

 

 

 

 


Nën organizimin e Ambasadës së ShBA-së në Tiranë dhe Bibliotekës Kombëtare të Shqipërisë më 28 shtator u çel në mjediset e kësaj të fundit konferenca rajonale e American Corner-ve.

Konferencën e hapi z. Aurel Plasari, drejtor i Bibliotekës Kombëtare, i cili mirseardhi të pranishmit si mikpritës i veprimtarisë dhe uroi mbarëvajtjen e saj.

Duke marrë fjalën, znj. Deborah A. Johnes, zv/ambasadore e ShBA-së, falënderoi për pjesëmarrje në konferencë z. Ferdinand Xhaferraj, ministër i Turizmit, Kulturës, Rinisë dhe Sporteve, Z. Aurel Plasari si titullar i institucionit bashkorganizator si edhe pjesëmarrësit në konferencë. Ajo theksoi se ambasada amerikane në Tiranë u kushton rëndësi këndeve amerikane si vende që mbledhin dhe informojnë për çështje të ndryshme të shoqërisë dhe kulturës amerikane kryesisht të rinjtë. Ishte pikërisht veprimtaria e suksesshme e tyre në Shqipëri që nxiti organizimin e kësaj konference në Tiranë me qëllim shkëmbimin e ideve dhe përvojave, tha ajo. Pastaj Znj. Johnes prezantoi edhe ekspertët e ardhur nga Uashingtoni si lektorë në këtë konferencë.

Në fjalën përshëndetëse z. Ferdinand Xhaferraj vlerësoi organizimin e konferencës dhe në përgjithësi punën e këndeve amerikane në Shqipëri dhe rajon. Ai i kërkoi përfaqësueses së ambasadës amerikane ndërmjetësimin për praninë e dëshiruar t\ Z. J. Billington, drejtor i Bibliotekës së Kongresit në Uashington, në konferencën Bibliotekat në shekullin XXI, që Biblioteka jonë Kombëtare do të organizojë muajt e ardhshëm.

Konferenca do të zhvillojë punimet deri më 30 shtator.