Ngjarje

 

 

Instituti Italian i Kulturës, në bashkëpunim me institucione shkencore dhe kulturore në Tiranë, ka programuar disa veprimtari që shënojnë 150-vjetorin e Bashkimit të Italisë. Këto veprimtari nisën mbrëmjen e 10 nëntorit në mjediset e Bibliotekës Kombëtare me konferencën Garibaldi dhe liria e popujve, mbajtur nga znj. Anita Garibaldi, stërmbesë e heroit të madh të popullit italian.

Duke çelur konferencën, z. Aurel Plasari, drejtor i Bibliotekës Kombëtare, shprehu kënaqësinë e veçantë për praninë e znj. Garibaldi në ceremoninë festive të kësaj ngjarjeje të rëndësishme në historinë e Italisë. Pasi përshëndeti pjesëmarrësit në veprimtari, ai ftoi miken nga Italia të mbajë ligjëratën e saj.

Anita Garibaldi, gazetare, publiciste dhe drejtuese e Qendrës së Studimeve Politike Europiane si edhe e Shoqatës Kombëtare Garibaldine, ngjalli interesin e të pranishmëve me trajtimin sa shkencor aq edhe emocional të personalitetit historik të stërgjyshit të saj. Ajo e trajtoi figurën e Garibaldit dhe epokën e tij si trashëgimi të rëndësishme të historisë së Italisë, si shembull të denjë për brezat e rinj. Ligjëruesja theksoi se fëmijëria dhe gjithë jeta e Garibaldit qe e lidhur ngushtësisht me detin dhe detarët, prej të cilëve kultivoi ndjenjën dhe konceptin e lirisë njerëzore. Shpesh ligjërata e saj mori tone himnizuese për hapësirën individuale dhe shoqërore të lirisë, për të drejtat njerëzore në përgjithësi..

Znj. Flavia Tibaldi, drejtoreshë e Institutit Italian të Kulturës, i njohu të pranishmit me veprimtaritë e tjera që do të zhvillohen këto ditë në Tiranë në përkujtim të përvjetorit të Bashkimit të Italisë.

Miqtë e ftuar shijuan filmime dhe muzikë që evokojnë ngjarjen e përkujtuar, po ashtu edhe buffetin e dhënë me këtë rast.