Ngjarje

Arbëreshët në Risorgimento-n italiane 

 

Më 12 nëntor vijuan në Bibliotekën Kombëtare veprimtaritë për 150 vjetorin e Bashkimit të Italisë. Në një nga mjediset e saj u mbajt konferenca Arbëreshët në Risorgimento-n italiane nga studiuesi arbëresh Elio Miracco si dhe u bë paraqitja e ribotimit të librit Shqiptarët dhe Garibaldi të historianit Koli Xoxi.

Në fjalën hyrëse, drejtor i Bibliotekës Kombëtare Aurel Plasari, u uroi mirëseardhjen të pranishmëve në veprimtari, e cila, nënvizoi ai, u kushtohet marrëdhënieve të shqiptarëve (arbëreshë dhe shqiptarë të Shqipërisë) me Garibaldin. Pastaj ai prezantoi z. Elio Miracco, profesor në Institutin e Studimeve Shqiptare pranë Universitetit të Romës “La Sapienza”.

Në ligjëratën e tij Elio Miracco, autor i njohur në fushën e studimeve letrare, të teorisë dhe historisë së letërsisë dhe në kritikën letrare, trajtoi kontributin e arbëreshëve në Bashkimin e Italisë. Pasi foli për kontributin e kahershëm në historinë e Italisë, u ndal posaçërisht në përfshirjen e tyre në periudhën e rëndësishme të viteve 1800. Duke iu referuar herë pas here edhe librit të autorit Koli Xoxi, ligjëruesi theksoi kontributin e arbëreshëve si luftëtarë, politikanë etj. në historinë e popullit italian.

Duke marrë fjalën studiuesi Koli Xoxi falënderoi Institutin Italian të Kulturës në Tiranë për ribotimin e librit, z. Elio Miracco për vlerësimin e librit dhe Bibliotekën Kombëtare për organizimin e prezantimit. Ai gjithashtu dha autografë për të pranishmit e interesuar për ribotimin e librit të tij “Shqiptarët dhe Garibaldi”.